Tài bơh trồ tơngai duh jŏ jòng bal mờ bơta duh ir, geh ngai gơguh tus mờr 40 độ C bal mờ ờ tơl dà tuh neh lơh uă bă kơphê tàm kơnhoàl Đăk Hà, càr Kon Tum gơtìp rơđò nha, ro ntê mờ gơjrùh plai. Hoàc hươr uă ngan rlau jơh gơbàn gơ wèt mờ bă kơphê ơm bơdìh tiah tuh dà bơh ală broă lơh bơtơ̆t tơnau dơng dà dê. Jăt Ủy ƀan Ñân zân kơnhoàl Đăk Hà dê yal, tŭ do geh rlau 71 lồ kơphê tàm thôn Bình Minh, xã Hà Mòn neh ờ gam dà tuh tài bơh tơnau dà C3 soăt jơh. Bal mờ rlau 15 rbô lồ, kơnhoàl Đăk Hà là kơnhoàl geh bă kơphê dờng ngan rlau jơh càr Kon Tum dê.

Tàm tŭ tơngai duh, ro kơnrañ yal lài gam pơn jăt tai jŏ jòng den tŭ do uă broă lơh bơtơ̆t tơnau dơng dà dềt tàm ù tiah kơnhoàl Đăk Hà, càr Kon Tum neh gơ ơm tàm bơta soăt jơh dà. Nàng dong kờl chi tam bàr pe hìu làng bol neh tă priă lơh gùng ding jòng gĭt nđờ kơi sồ nàng ƀồm dà pleh soăt dà mơya kung gam kal ke sơl pleh klàs hoàc hươr.