Pơrjum geh lơh jat broă lơh pờ tơlik tơn tàm internet pơgồp bal mờ pơrjum tơn, lơh gơlik bơta niam ai gal ngan kwang đơng lam bồ ală càr tàm tiah Tây Nguyên, ală mpồl gah lơh phan, mpồl lơh sa kă bro, ala mat ală anih lơh broă, mpồl dong kờl kă bro tàm lơgar mờ lơgar ndai tus bal.

Ồng Vũ Bá Phú, kwang atbồ Kụk hòi jà kă bro - Ƀộ Kông thương đơs nền, Tây Nguyên là tiah lơh gơlik uă phan bơh suơn sre tờm ngan uă ngan, geh khà uă, ngan là chi tam kông nghiệp, chi sa plai. Bàr, pe bơta phan tac hờ lơgar ndai gơ wèt khà 1 tàm tiah do kung bè dunia bè kơphe, tiêu, plai màk, điều. Bă ù tam ală bơta chi lơh sơnơm kuơmàng bè kơnuh sơnơm Ngọc Linh, sâm dây, bơsềt liñ ci pơrhê, điñ lăng, hà thủ ô, đương quy, bơkàu hoè… kung gam bơtàu tơnguh mhar, lơh gơs ală tiah tam tờm chi lơh sơnơm tơrgùm bal tàm Tây Nguyên.