Càr Dăk Lăk tŭ do geh 37 ngân hàng, 12 anih ai càn priă làng bol mờ 226 anih lơh broă ngân hàng tàm ală xã, sơnah ƀòn, thị trấn, geh tơl priă nàng lơh sa, kă bro, ngui dơ̆ bơh làng bol dê, mpồl lơh sa kă bro in.

Tus tŭ do, priă gam geh nàng ai càn gah lơh kơphe tàm càr Dăk Lăk geh rơlao 19 rơbô 300 tơmàn đong, geh mờr 14% kờp jơh khà priă gam geh. Nam do, ală mpồl ai càn priă tàm càr Dăk Lăk ai geh di pơgăp 7 rơbô 500 tơmàn đong nàng ai càn drơng tàm broă blơi, lơh kơphe. Ồng Lê Văn Lương, Phó kwang atbồ Ngân hàng dà lơgar Việt Nam tàm càr Dăk Lăk pà git: mờ nùs nhơm lơh broă bal, tam pà bal, gah ngân hàng tŭ lơi kung rơcang lài nàng bơsong kal ke, di pal jơnau kờñ priă drơng bơtàu tơnguh lơh sa in.