Mpồl tàñ ồi kòn cau bơh yau ƀòn Mùi 2, xã Cư Né, kơnhoàl Krông Buk, càr Dăk Lăk tŭ do geh rlau 200 nă cau tàm mpồl. Do ndrờm là ală cau jơh bơsram ơdŭ bơto broă lơh tàñ ồi bơh Mpồl tam klac cau ùr kơnhoàl pơgồp bal mờ Anih tờm bơto bơtê broă lơh – Bơto bơtê sùm kơnhoàl Krông Buk lơh nam 2017. Tơnơ̆ tŭ bơsram broă lơh, ală bi neh tơrgùm bơ tòm wơl nàng lơh mpồl lơh sa, jòi cau blơi phan. Bi Hoàng Thị Niệm, kòn cau Tày, atbồ Mpồl tàñ ồi kòn cau bơh yau ƀòn Mùi 2 pà git, mờ tơl sră sră dan blơi phan, mpồl rơp dờp mờ ơpah wơl ală cau tàm mpồl in mờ priă tơm bơh 300 tus 500 rbô đông tàm dùl nơm phan. Broă tàñ phan mờng lơh tàm ală tŭ ru mơya neh dong ală oh mi cau ùr geh tai priă jền, mờ gam gơtùi sền gàr broă lơh bơh yau tai: “Să tờm añ den kờñ ngan broă tàñ ồi kòn cau bơh cau Rơđê dê. Ală tŭ ru, ală ngai trồ mìu den kung lơh nàng geh tai priă jền. Tŭ do, mpồl tàñ ồi kòn cau kung dong kờl, ai geh broă lơh ai oh mi cau ùr in sùm geh priă jền lơh geh”.

Tàm pơn jat tai ală cồng nha lơh geh, nam do, kơnhoàl Krông Buk pơn jat tai pờ ơdŭ bơto pơlam bơta chài tàñ ồi kòn cau khoă dơ̆ 2. Ơdŭ bơsram geh pờ bơh nggùl nhai 3 pa do, gơ hòi gơ jà 35 nă cau tus bal. Bi H’Hà Kpă, kòn cau Rơđê ơm tàm ƀòn Ktơng Drun, xã Cư Né, kơnhoàl Krông Buk yal: “Tŭ pa sơn đờm mut bơsram den gŏ gơ kal ke ngan mơya tŭ neh lơh rơhời den gơ kung kwèng sơl, gŏ gơ lơh kờñ ngan mờ broă bơsram. Tŭ do oh mi cau ùr kờñ ngan, ngai lơi kung lòt bơsram, tơnơ̆ do jơh bơsram gơtùi mòn gơs phan să tờm in den tơnơ̆ hơ̆ dilah geh anih lơi blơi, tac gơtùi phan he tàñ gơs hơ̆ sồng lơh geh priă jền să tờm he in”.

Kung mờ broă tàñ ồi kòn cau sơl, tàm nam do, kơnhoàl Krông Buk rơp pờ 9 ơdŭ bơto broă lơh lơyah tơngai ai 300 nă cau in bơsram, mờ ală gah broă krơi is bè: hàn đèng, crăp đèng dà, mai kông nghiệp, ròng phan, tam bơsềt. Mò Nguyễn Thị Thu Trang, Phó Kwang atbồ drơng broă Anih tờm Bơto bơtê broă lơh – Bơto bơtê sùm kơnhoàl Krông Buk pà git, ală mpồl, gah broă lơh tàm kơnhoàl neh pơgồp bal lòt sền, lùp jơnau kờñ bơsram broă lơh bơh làng bol dê nàng bơt bơtàu broă rơndap lơh bơto bơtê broă lơh dipal: “Cau bơsram kờñ ngan tus bal, bơdìh mờ geh bơto bơtê ờ sa priă den ală oh gam geh dờp ală broă dong kờl tai. Tềng đap mat là bơto ală oh in git lơh broă nàng gơtùi sền gàr broă lơh bơh yau ƀòn lơgar dê. Ală ơdŭ do bơto bơtê sùm ală oh in, pơgap 3 nhai là ală oh geh pà sră cơng tàng jơh bơsram broă lơh”.

Tàm gùt càr Dăk Lăk, bơh nam 2021 tus tŭ do, càr neh bơto broă lơh ai rlau 7 rbô nă cau lơh broă tàm ƀòn lơgar in, tàm hơ̆ geh rlau 6 rbô nă cau lơh broă là cau jơi bơtiàn dồ êt nă cau. Jat Sở Lao động, Thương ƀiñ mờ Xã hội càr Dăk Lăk pà git, rlau 80% cau bơsram geh broă lơh pa mờ geh tơnguh bơta chài lơh broă ai cồng nha, priă jền lơh geh uă rlau. Ồng Nguyễn Quang Thuân, Phó Kwang atbồ Sở Lao động, Thuơng ƀiñ mờ Xã hội càr Dăk Lăk pà git, nàng broă bơto broă lơh lơh geh cồng nha, broă lơh bơto bơtê geh lơh jat broă lùp jơnau kờñ cau bơsram dê mờ jơnau kờñ bơh drà lơh broă dê kung bè bơta geh ngan lơh sa mpồl bơtiàn bơh càr dê: “Bol hi kung neh kĭ broă lơh pơgồp bal mờ ală mpồl lơh sa kă bro tàm càr, bơdìh càr geh jơnau kờñ rơ wah cau lơh broă; cribơyai, lơh broă mờ ală hìu bơsram trung kâp, kao đẳng tàm càr nàng sơlơ tàm yal jơnau, ai ală gah broă khi gam kờñ nàng bơto bơtê. Gơ wèt mờ cau lơh broă jòi is broă lơh den bol hi kung neh lơh broă mờ ngân hàng cíñ sác. Bơh rơndap broă lơh bơh tơl nă cau lơh broă dê rơp dong kờl ai càn priă mờ kờp bal mờr 50 tơlak đông dùl nă cau”.

Bơh bơto broă lơh, làng bol ƀòn lơgar tàm càr Dăk Lăk geh bơto ală jơnau git wă kuơmàng bè bơta chài lơh broă mờ pràn jak lam lơh ngan ngồn, tơnguh bơta chài lơh broă, dong khi geh bơta mờ tŭ niam jòi broă lơh dipal, tơnguh priă jền lơh geh. Broă bơto broă lơh jat jơnau kờñ cau bơsram mờ bơta geh ngan tơl tiah dê kung pơgồp bơnah tam gơl rơndap tap sèng cau lơh broă, rơndap tap sèng lơh sa, lơh gơlik bơta gơn kơnờm bơtàu tơnguh lơh sa – mpồl bơtiàn.