Tàm dar pơrjum ală kwang bàng Cíñ phủ cribơyai sền swì, ai jơnau đơs, ring bal gơ wèt mờ 4 rơndăp broă lơh Adăt, geh: Adăt Rơndăp broă Cíñ phủ (tam gơl, bơtơl); Adăt Rơndăp broă Gơnoar ătbồ ƀòn lơgar (tam gơl); Adăt Ai lơh jăt sră nggal gơrềng tus kơrnoăt boh lam (tam gơl); Adăt Mŭt bal tàm mpồl sền gàr ring lơngai Liên hợp quốc dê. Đơs tàm dar pơrjum, Thủ tướng ồng Phạm Minh Chính đơs nền, do là ală rơndăp broă lơh adăt, jơnau lơh nền tàm pơrjum kwơmàng, nàng kờñ di tŭ lơh gơs adăt boh lam ală gùng dà dờng bơh Đảng dê bè tam gơl pa mpồl lơh broă, broă lơh bơh Cíñ phủ dê, gơnoar ătbồ ƀòn lơgar dê jăt gùng dà “tơrmù dipal, tơl, pràn- lơh broă cồng nha- lơh broă gơtùi- geh cồng nha”.

Tơngai dồ êt, jơnau sồr uă, ù tiah ơnàng, tơnggume kal ke, ờ bươn soh, Thủ tướng sồr ală kwang bàng Cíñ phủ tơrgùm bồ tơnggoh jak, sền jơnau yal, đơs tă pơgồp jơnau lơyah, ƀươn uă, niam, loh jơnau, đơs song tơn tàm broă tờm kwơmàng; tơrgùm tàm lùp bè ală broă kwơmàng, ai jơnau đơs krơi is kờñ cribơyai, dan jơnau jơnau đơs Cíñ phủ dê, pal lơh jăt di tơngai, cồng nha bơh dar pơrjum dê.