Jat jơnau yal, nam 2024, Cíñ phủ, Thủ tướng Cíñ phủ neh jat sền ală Jơnau lơh nền tàm pơrjum, jơnau đơs pơndŭt bơh Đảng Dà lơgar, Quôk hội nàng sồr lơh, đơng lam di gùng, den tàng bơta lơh sa- mpồl bơtiàn lơgar he dê pơn jat tai bơtàu tơnguh wơl niam ngan; lơh geh uă cồng nha mpờl gŏ ngan tàm jơh ală gah broă mờ niam rlau mờ nam 2023.

Đơs tàm pơrjum, Thủ tướng ồng Phạm Minh Chính đơs sùm, pơrjum chờ hờp ngan geh Tổng Ƀí thư ồng Tô Lâm tus bal mờ đơs sồr lơh. Jơnau đơs sồr lơh kwơ màng ngan, jơh nùs, jrô ơnàng làm uă mờ tơl làm bơh Tổng Ƀí thư dê ngan ngồn là bơta pơndờm pơnđiang, pơn jờng dờng màng mờ là pơlam gùng dà sùm ai Cíñ phủ, ală kấp, ală gah broă, ală tiah in lam lơh jat kơnòl broă nam 2025 mờ tàm tơngai tus. Tơngume bơh nam 2025 là “Duh rơngòt kơrnoat boh lam geh kơnòl broă; rcang lài di tŭ; tơrmù niam geh cồng nha; tơnguh tam gơl pràn uă”, Cíñ phủ, Thủ tướng Cíñ phủ tơrgùm sồr lơh jat dồ ròt bal ală Jơnau lơh nền tàm pơrjum, jơnau đơs pơndŭt bơh Đảng, Quôk hội dê, tơrgùm tàm 3 broă lơh tam gơl pràn kwơ màng, 6 kơnòl broă tờm, 12 mpồl broă lơh tờm mờ 185 kơnòl broă ngan ngồn.