Tàm dơ̆ lơh broă, Tổng Ƀí thư ồng Tô Lâm jờng rơ mpồl ling tiah do neh lơh gơs niam kơnòl broă tàm nam do òr. Bè kơnòl broă tàm tơngai tus, Tổng Ƀí thư sồr, ling tiah do pal sùm kơlôi sơnơng jrô jơnau sồr bơh Đảng dê, broă dong kờl, kơrnoăt boh lam Dà lơgar dê, jơnau lơh nền tàm pơrjum, jơnau sồr bơh Anih duh broă đơng lam Đảng Ling klàng Dà lơgar dê, Ƀộ Ling klàng dê mờ broă kơnòl broă bơh Mpồl phàu crong Ling tiah do dê, lơh ngan jơh nùs lơh geh cồng nha ală jơnau kờñ, kơnòl broă tàm Jơnau lơh nền tàm pơrjum bơh Pơrjum dơ̆ 13 bơh Đảng dê, Jơnau lơh nền tàm pơrjum bơh Pơrjum dờng Đảng ƀộ Ling tiah do dơ̆ X dê. 

Rơcăng lài, jơh nùs tă pơgồp jơnau đơs ai Anih duh broă đơng lam Đảng Ling klàng Dà lơgar, Ƀộ Ling klàng in mờ pơgồp bal mờ kâp ủy, gơnoar ătbồ tiah do bơ̆t bơtàu rài jơh gùt làng bol sền gàr dà lơgar, nùs nhơm rơcăng lài sền gàr dà lơgar tàm jơh gùt làng bol gơ jăt bal mờ nùs nhơm làng bol rơcăng lài sền gàr lơngăp lơngai mờ bơ̆t bơtàu kơnhoàl ù tiah rơcăng gàr lài kơ̆ kơnhăp. Is ồn pal gĭt nền broă, bơsong di tŭ ală jơnau digơlan gơlik geh, bañ lời gơtìp rơmơ̆p ndơl, nisơna, gàr kơ̆ kơ̆ kơl jăp cíñ trị, lơh geh tơl ală bơta nàng ală tiah in bơtàu tơngguh lơh sa- mpồl bơtiàn.