Ngai chờ “Pơnyờ să kơnòm bơsram, cau bơsram dờng càr Dăk Lăk” geh bơyai lơh mờ uă broă lơh dơ̆ lĕ bal bè chờ tàp pràn să jan “Ơruh pơnu pràn kơl dang”, broă lơh “Tìp bal niam chài Việt Nam - Ấn Độ”, Dơ̆ pơrlòng tàm kơndang “Pơnyờ să lơgar Việt Nam”, Cri bơyai “Tơnguh uă bơta niamsrơh cau bơsram dờng 5 niam”, “Kơnờm bơsram 3 bơsram tàp” mờ broă lơh tơnkah 75 nam Ngai bơhiàn kơnòm bơsram, cau bơsram dờng mờ Mpồl Cau bơsram dờng Việt Nam.

Bơta tơngŏ tờm ngan bơh ngai chờ là ală broă lơh cau bơsram dờng tơrgùm bal mờ ală lơgar, tìp bal niam chài đah lơgar Việt Nam mờ lơgar Ấn Độ. Ală cau bơsram dờng geh cri bơyai, yal bè bơta niam chài, lơh chờ mờ ală tiah lòt nhơl krơi is tàm càr Dăk Lăk mờ lơgar Ấn Độ, tìp bal mờ cau bơsram dờng lơgar Ấn Độ gam bơsram tàm Hìu bơsram Đại họk Y Dược Buôn Ma Thuột. Cau bơsram dờng Lê Quốc Tuấn, gah Kă bro phan, Hìu bơsram Đại họk Tây Nguyên yal: “Do là dơ̆ sơnrờp añ geh tus bal broă tìp bal mờ bơyô bơh ală lơgar bè do. Să tờm añ ờ khin, mơya tŭ tus bal den añ gŏ ală bơyô cau lơgar Ấn Độ đềt mềr, sơrmah sơrmài ngan. Geh dơ̆ tus bal ală broă lơh tơrgùm bal mờ ală lơgar bè do den añ gŏ gơlơh niam ngan tài añ gơtùi gŏ mờ bơta pràn ngui jơnau đơs dà lơgar bơdìh dê, pin dờn tềng đăp mờ gal cau rơlao, lơh kuèng mờ uă bơyô, geh uă bơta git gơ̆p pa”.

Di tàm dơ̆ do, Tỉñ đoàn càr Dăk Lăk neh yal lơh gơs Mpồl cau bơsram dờng 5 niam kấp càr, jờng rơ “Kơnòm bơsram 3 niam”, “Cau bơsram dờng 5 niam” ală kấp nam bơsram 2023-2024, jào priă dong kờl bơsram sră “Sòl nàng jơnau kơ̆p kờñ – Cau kơnòm să càr Dăk Lăk”, pà priă dong kờl bơsram sră ai ală cau bơsram dờng lơgar Lào gam bơsram tàm ală hìu bơsram tàm càr Dăk Lăk in. Lŏ Phan Thị Trinh, Phó Ƀí thư Tỉñ đoàn càr Dăk Lăk pà git, ală broă lơh nàng lơh geh ƀlàng nhơl geh kwơ ai kơnòm bơsram, cau bơsram dờng, tơlik nùs nhơm tam klăc bal, git geh kơnòl bơh rài kơnòm să dê. “Dùl ƀlàng nhơl ai ală oh in tus bal, tìp bal bơsram bal, bơsram tàp tơrgùm bal mờ ală lơgar bal mờ ală bơyô cau bơsram dờng lơgar Ấn Độ mờ lơgar Lào. Mpồl duh broă lơh kơnòl broă sùm Tỉñ đoàn kung geh ală broă lơh tờm nàng lơh broă bal mờ ală kơnòm bơsram 3 niam, cau bơsram dờng 5 niam, kơnòm bơsram 3 bơsram tàp, pơgồp bal tàm ală khà broă nàng ală kơnòm bơsram geh bơta pràn mờ lơh broă bal mờ đoàn, mpồl lơh broă tàm tơngai tus”.

Lài mờ hơ̆, Tỉñ đoàn càr Dăk Lăk, Mpồl tam klăc Ơruh pơnu Việt Nam càr mờ Mpồl Cau bơsram dờng Việt Nam càr kung neh pơgồp bal bơyai lơh Broă lơh “Tìp măt mờ jờng rơ cau bơsram dờng jơi bơtiàn ờ gal cau geh pơnrơ jăk” càr Dăk Lăk dơ̆ 16.

Tàm ală nam do, ală broă bơtàu tơnguh lơh sa, niam chài tàm ală tiah ngài, tiah làng bol jơi bơtiàn ờ gal cau càr Dăk Lăk lơh geh uă cồng nha niam. Bal mờ ơruh pơnu gùt lơgar, ơruh pơnu ală jơi bơtiàn ờ gal cau tàm càr Dăk Lăk pơn jăt tai ai tơngŏ gơnoar, geh bơsram sùm, bơsram tàp, lơh ngan brồ guh tàm rài kis. Ngai sơlơ geh uă ơruh pơnu jơi bơtiàn ờ gal cau geh bơta pràn mờ geh bơta ngăc ngar tàm broă bơsram sră, bơsram geh ală jơnau chài, bơsram tàp jơnau git wă tàm rài kis, bơta pràn lơh broă mpồl bơtiàn nàng drơng Dà lơgar, bơ̆t bơtàu ƀòn lơgar. Tàm broă lơh, cau bơsram dờng neh tus bal uă broă lơh bè: Chu ñàng tềng Jơnang kah kơlôi ală cau ling chơ̆t màng Nam Tiến mờ pơdơng bơkào tềng Rùp kah kơlôi Wa Hồ; broă lơh “Jòi sền niam chài” , Cri bơyai “Bơyai bè bơta niam chài krơi is cau bơsram dờng càr Dăk Lăk tàm broă tơrgùm bal mờ bơtàu tơnguh”, boh bơr “Tơrbŏ bal cau bơsram dờng mờ cau lơh sa kă bro, mpồl lơh sa kă bro”.

Bơh tŭ hơ̆, geh dong kờl cau bơsram dờng git nền nòn rơlao bè bơta kwơ niam chài bal mờ bơta krơi is bơh càr dê; khin boh bơr, pơgồp bal jơnau đơs tàm ală broă lơh niam chài, mpồl bơtiàn, pơgồp bal tàm broă bơtàu tơnguh càr dê. Cau bơsram dờng H’ Uyên Byă, bơsram tàm hìu bơsram Đại họk Sư Phạm ƀòn dờng Hồ Chí Minh yal: “Ală broă lơh ngai do dong kờl añ git bè ală cau uă rơlao, dong kờl añ wă tai bè bơta kwơ niam chài tàm tiah añ ơm kis. Bơta do sơlơ lơh añ kờñ rê mờ ƀòn lơgar mờ bơtàu tơnguh să tờm rơlao nàng dong kờl ƀòn lơgar bơtàu tơnguh mờ ngai do añ kung chờ hờp ngan tài añ là dùl tàm ală cau bơsram dờng jơi bơtiàn ờ gal cau geh jờng rơ”.

Di tàm dơ̆ do, Mpồl Cau bơsram dờng Việt Nam càr Dăk Lăk neh jờng rơ 50 nă cau bơsram dờng jơi bơtiàn ờ gal cau geh pơnrơ jăk tàm nam bơsram 2023-2024. Bơyai lơh tơlik măt Mpồl Niam chài krơi is Cau bơsram dờng càr Dăk Lăk. Mpồl do geh lơh nàng ai geh ƀlàng nhơl geh kwơ, dong kờl ală cau kơnòm să in geh dơ̆ niam nàng jòi wă, jòi sền mờ prăp gàr ală bơta kwơ niam  ờs mờng bơh jơi bơtiàn dê.