Jăt jơnau yal, nam 2024 geh rlau 20 rbô 500 jơnau yal tơnggĭt, jơnau cih bơh ală anih lơh broă sră ƀăo dê cih bè càr Kon Tum. Bal mờ yal tơnggĭt jơnau wil tơl, di tŭ ală broă lơh, sră ƀăo kung neh gŏ, yal wơl ală bơta ờ hềt dipal, kal ke, ờ pràn jak tàm bàr pe tiah, mpồl lơh broă tàm càr. Do là dồ gah yal tơnggĭt jơnau kwơmàng dong broă lơh sồr lơh, đơng lam lơh jăt càr Kon Tum dê ngai sơlơ gơtùi mờ geh cồng nha. Đơs tàm pơrjum, ồng U Huấn, Phó Ƀí thư Tỉñ ủy càr Kon Tum kơ̆p kờñ: Nam 2025, sră ƀăo pal lơh gơnoar broă kwơmàng tàm mblàng yal, yal tơnggĭt jơnau bè bơta đơng lam, ătbồ đơng lam lơh jăt bơh ală kâp, ală gah dê, Pơrjum dờng Đảng ƀộ ală kâp tơngai lơh broă bơh nam 2025- 2030, lơh hô hơng pơn jờng jơh gùt Đảng, gùt làng bol, gùt ling klàng tơrgùm bal pràn, dồ nùs bal jơh nùs lơh ngan lơh jăt geh cồng nha dơ̆ tam gơl bơta yau gơgơs bơta pa bè rơndăp tăp sèng, tơrmù dipal rơndăp mpồl lơh broă bơh ală anih lơh broă cíñ trị dê.

Di dơ̆ do, Mpồl bơyai lơh Khà jờng Mŭt Mơ̆ rơmĭt Tỉñ ủy càr Kon Tum jàu 35 khà, tàm hơ̆ geh 8 khà B; 12 khà C mờ 15 khà pơn jờng ai ală cau, mpồl cau cih jơnau lơh geh Khà jờng Sră băo bơ̆t bơtàu Đảng bơh Đảng ƀộ càr Kon Tum dơ̆ IV nam 2024 dê.