Drim òr (09/01), tàm ƀòn dờng Hồ Chí Minh, di tàm dơ̆ rơcang wă rò satềp nam pa Ất Tỵ 2025 mờr tus, wèt tus 95 nam Ngai crơng gơs Đảng Kộng sản Việt Nam (3/2/1930-3/2/2025) Tổng Bí thư ồng Tô Lâm tus mờ đơng lam dơ̆ tìp măt ală kwang bàng đơng lam bồ Đảng, Dà lơgar lài do, kwang bàng đơng lam bồ lài do geh pơnrơ, cau ala măt cau bơsram dờng, cau chài đơs crih tamya ală càr, ƀòn dờng đah jum dà lơgar.

Tàm dơ̆ tìp măt, Tổng Ƀí thư ồng Tô Lâm đơs sùm, tàm ală pơrjum pa do, Đảng Dà lơgar neh ring bal uă bè broă ai jơnau git wă tờm ngan bè rài pa, rài brồ să bơh jơi bơtiàn dê, hơ̆ là rài bơtàu tơnguh, rài pas gơs, rài pràn kơl dang tềng đăp mờ broă đơng lam bồ, at gơnoar bơh Đảng Kộng sản dê. Tŭ sơn đờm rài pa là Pơrjum dờng dơ̆ XIV Đảng dê mờ nàng lơh jăt ală gùng dà broă lơh jăt jơnau kờñ jŏ jòng do, Đảng, Ƀộ Cíñ trị, Ƀan Ƀí thư, Quốk hội, Cíñ phủ neh ai geh uă gùng dà broă lơh kwơ màng. Tổng Ƀí thư pà git, Đảng Dà lơgar sùm ai loh broă bơtàu tơnguh mhar mơya pal kơl jăp pal geh bơ̆t bơtàu tàm bơta tờm jăk chài, măi mok pa, tam gơl sồ mờ kwơ màng là ai kòn bơnus lơh tờm, sền kwơ broă bơtàu tơnguh cau lơh broă jăk chài. Pơn jăt tai lam mpồl lơh sa kă bro bơcri priă tàm broă kơlôi sơnơng mờ bơtàu tơnguh, tàm hơ̆ uă ngan là tàm ală gah broă măi mok pa ha là măi mok siñ họk; ai geh tiah ƀuơn niam mpồl lơh sa kă bro in mŭt lơh broă, tam gơl pa bơceh lơh mờ lơh gơlik geh bơta kwơ lơh sa pa in. Tổng Ƀí thư dùl dơ̆ tai tơlik nùs nhơm kơ̆p kờñ pơn jăt tai dờp geh jơnau kờñ bal, pơgồp bal kwơ màng bơh ală kwang đơng lam bồ lài do, ală cau bơsram dờng, cau jăk chài, cau chài đơs crih tamya-do là ală cau sùm geh bơta chờ hờp, bơta pràn bal mờ bơta pràn nùs nhơm dờng màng tàm gùng bơtàu tơnguh dà lơgar dê.