Tơngai lài, gĭt gơ̆p cíñ trị, cribơyai broă mờ lơgar ndai đah Việt Nam mờ Lào pơn jăt tai bơtàu tơngguh niam bơnĕ, tam klăc đềt mềr, pin dờn; bàr gah neh bơyai lơh geh cồng nha Dơ̆ pơrjum dơ̆ 46 Anih duh broă ală Cíñ phủ Việt Nam mờ Lào (tàm ngai 07/01/2024) mờ Dơ̆ tìp ờs mờng pah nam bàr Đảng nam 2024 (26/02/2024); jơh nùs lam lơh ală dơ̆ lòt còp bơh kwang đơng lam bồ kâp dờng mờ ală kâp dê. Việt Nam tŭ do geh 241 rơndăp broă lơh bơcri priă tàm lơgar Lào bal mờ kờp jơh priă bơcri cih mat tàm sră pơ àr rlau 5 tơmàn 500 tơlak dolar Mỹ, pơn jăt tai ơm sùm anih dơ̆ 3 tàm khà ală lơgar mờ kơnhoàl ù tiah dà lơgar (tơnơ̆ lơgar Lo, Thái Lan). Priă kă bro phan đah Việt Nam mờ Lào 10 nhai bơh nam 2024 dê geh 1 tơmàn 700 tơlak dolar Mỹ (gơguh rlau 28% pơndrờm bal dồ tŭ mờ nam 2023).

Bàr gah pơgồp bal kơ̆ kơl jăp, tàm dong tàm kờñ bal gơ̆p tàm ală dơ̆ cribơyai lơh broă bal kơnhoàl ù tiah mờ ală lơgar; ngan là tàm dơlam mpồl Asean, Liên hợp quốc mờ ală mpồl tiah dềt. Tàm nam 2024, Việt Nam neh jơh nùs kờñ mờ dong kờl Lào dờp lơh kơnòl broă geh cồng nha ală gơnoar broă ală lơgar kwơmàng bè Củ tịc Asean nam 2024, Củ tịc AIPA 45.