Jơh gùt càr Kon Tum tŭ do geh 35 Mpồl lơh broă bal, mpồl lơh broă, mpồl lơh sa kă bro mờ mờr 800 broă lơh ròng phan uă bơh cau tàm mpồl cau ling yau dê lơh tờm. Ală broă lơh ròng kòn rồ me, be me bơh Mpồl cau ling yau 2 kơnhoàl Ngọc Hồi, Đăk Glei; broă lơh ròng ndung kă bro ờ bŏ bơh mpồl cau ling yau kơnhoàl Sa Thầy; broă lơh tam tờm chi lơh sơnơm bơh Mpồl cau ling yau kơnhoàl Tu Mơ Rông, pa lơh geh cồng nha lơh sa uă, geh lơh rề ơnàng uă nàng dong tai gĭt nđờ rơhiang nă cau tàm mpồl cau ling yau in brồ guh lik klàs rƀah kơ̆ kơl jăp. Cau ling yau A Tôn, ơm tàm ƀòn Pu Tá, xã Măng Ri, kơnhoàl Tu Mơ Rông geh suơn kơnuh sơnơm Ngọc Linh kờp priă uă tơmàn đong, pà gĭt:“Hìu bơnhă añ tam kơnuh sơnơm Ngọc Linh rlau 10 do rlau. Là Mpồl ling yau bơh thôn dê añ mblàng yal, hòi jà làng bol bè bơtàu tơnguh lơh sa hìu bơnhă nàng oh kòn in bơsram sră tus gùng tus dà. Dơ̆ 2 là mblàng yal, hòi jà làng bol bè bơta chài tam phan, bè tam tờm chi lơh sơnơm tàm hơ̆ geh kơnuh sơnơm Ngọc Linh priă lơh geh là uă ngan”.

Mpồl Cau ling yau càr Kon Tum geh mờr 19 rơbô nă cau tàm mpồl pơrjum tàm 111 mpồl ƀòn lơgar  tàm 10 kơnhoàl, ƀòn dờng tàm càr. Kơnờm lơh jat niam srơh “Cau ling yau dong bal mờ gơ̆p tơrmù rƀah, lơh sa jak”. 5 nam do khà hìu bơnhă rƀah cau tàm mpồl geh bơh rlau 16% gơmù gam hơđơm 8%. Ală kấp mpồl tàm càr kung dong cau tàm mpồl tơn jơh geh 500 nơm hìu lơh ing mờ lơh pa 44 nơm hìu bơta nđàc pà cau tàm mpồl cau ling yau dê.

 Đại tá ồng Võ Thanh Chín – Củ tịc Mpồl Cau ling yau càr Kon Tum, lài do Atbồ Gah đơng lam Mpồl Ling klàng càr, tơngŏ bơta jơh nùs kah ưn ngài Củ tịc Hồ Chí Minh, cau crơng gơs, pơlam tàp mờ là cau bèp rềp mềr kờñ gơboh uă ngan bơh ală mpồl ling phàu crong dê; kah ưn ngài Đại tướng ƀồc ồng Võ Nguyên Giáp, lài do là Kwang đơng lam dờng Mpồl Ling klàng Làng bol Việt Nam. Đại tá ồng Võ Thanh Chín pà gĭt, bulah neh ơm rlô lơh broă mơya ală kwang bàng kấp dờng mpồl ling klàng kung gam gàr kơ̆ nùs nhơm Cau ling Wa Hồ dê: “Bulah neh lik bơh mpồl ling mơya nùs nhơm Cau ling Wa Hồ dê kung gam sòl àng là gùng dà pơlam ai tơl broă lơh in. Bol añ dan tă pơgồp is bơta pràn, bồ tơngoh tàm broă lơh bơt bơtàu mờ sền gàr Dà lơgar. Bơto bơtê rơnàng kơnòm să in nùs nhơm kờñ gơboh Dà lơgar, broă lơh cau ling khin cha jak chài kăc màng dê”.

Đòm jat niam nùs nhơm, bơhiàn “Cau ling Wa Hồ” dê, ală rơnàng Cau ling yau bơh càr Kon Tum dê sùm gĭt wă tơl làm mờ sền kơnòl broă bơt bơtàu, sền gàr Đảng, gơnoar atbồ, sền gàr Làng bol, gàr kơ̆ kơl jăp cíñ trị, rơndăp tăp sèng mpồl bơtiàn tàm ƀòn lơgar là kơnòl broă cíñ trị kwơ màng lam lài. Mờ nùs nhơm geh kơnòl lơh jat Jơnau lơh nền tàm pơrjum sồ 04 bơh Tỉñ ủy càr Kon Tum bè “Pơn jat tai bơt bơtàu xã kal ke uă ngan tàm bơta pa”, mờ broă lơh “mpồl cau bal tềm pềr, cau dồ nă să tềm pềr”, mpồl cau ling yau neh dong 2 hìu bơnhă kal ke tàm thôn Ktu, xã Hơ Moong, kơnhoàl Sa Thầy lik klàs rƀah kơ̆ kơl jăp. Tŭ do, broă lơh do pơn jat tai geh lơh jat mờ lam lơh tàm thôn Kon Hia 1, xã Đăk Rơ Ông, kơnhoàl Tu Mơ Rông jat nùs nhơm Broă rơndăp lơh bơh Mpồl Lơh kơnòl broă sùm Tỉñ ủy càr Kon Tum dê.

Gơtùi đơs nền là, srơh Cau ling yau dong bal mờ gơ̆p tơrmù rƀah, lơh broă sa sùm geh ală kấp Mpồl Cau ling yau tàm càr Kon Tum bơyai lam lơh jat geh cồng nha,  geh bơta lơh gơ rề uă tàm uă gah. Bơh hơ̆, pơgồp bơnah bơtàu tơnguh rài kis mờ lơh geh bơta gơn kơnờm gơ kờñ, pơn jờng cau tàm mpồl in tơryang tơryồng tàm pơrlòng lơh broă sa, lơh jat nùs nhơm lơh is, pràn is, tam gơl pa bơta mờng sơnơng mờ bơta mờng lơh broă. Ngan ngồn, ală broă lơh bơh Mpồl Cau ling yau lơh jat neh pơgồp bơnah tàm broă tàm trờn rơn dăp tăp sèng phan tam, phan ròng, ngui bơta ƀuơn, bơta pràn bè ù tiah, lơh broă, priă bơcri nàng bơcri priă bơtàu tơnguh lơh sa. Cau tàm mpồl Cau ling yau neh khin cha jat ngui bơta gơguh pa tam phan, măi mok tàm broă lơh, lơh gơlik phan, prap gàr mờ tăc bro phan lơh geh bơh suơn sre... Tus tŭ do, tàm càr Kon Tum geh 1 Mpồl “Cau ling yau, Cau ling yau geh griăt lơh sa, kă bro”, 720 broă lơh ròng mờ tam phan uă,  hìu bơnhă ròng phan uă, 11 mpồl lơh broă bal, 6 mpồl lơh broă, 12 mpồl lơh sa kă bro bơh cau tàm mpồl Cau ling yau dê lơh tờm, lơh geh broă lơh ai pơgăp 3 rơbô 500 nă cau geh priă lơh geh kơ̆ kơl jăp.