Nam 2024, Lơh kơnòl broă sùm Đảng ủy, Gah đơng lam Ling tiah 5 neh đơng lam, sồr mpồl phàu crong Ling tiah 5 lơh jăt nền nòn, ndrờm bal, geh cồng nha ală jơnau lơh nền, jơnau sồr, rơndăp broă lơh jŏ jòng bơh Quân ủy Dà lơgar, Ƀộ Ling klàng dê bè kơnòl broă ling klàng, sền gàr dà lơgar tàm bơta pa.

Ling tiah 5 pơgồp bal mờ ală càr, ƀòn dờng đơng lam lơh tiah rơcang gàr lài, broă lơh tam lơh ngai sơlơ geh lơh gơs. Đơs tàm pơrjum, Thượng tướng ồng Hoàng Xuân Chiến, Thứ trưởng Ƀộ Ling klàng sồr tơrgùm drơng gàr bơ̆t bơtàu mpồl ling phào crong Ling tiah 5 ngai sơlơ pràn kơl dang tơl ală bơta bè cíñ trị, bồ tơngoh kơlôi sơnơng, di pal mờ jơnau kờñ lơh jăt kơnòl broă tàm bơta pa. Bơto bơtê bơhiàn 80 nam bơh Ling klàng mờ rơcang ai 80 nam bơhiàn bơh Mpồl ling phào crong Ling tiah do dê, bal mờ ală broă lơh dờng dà lơgar dê mùl màl niam nàng geh nùs nhơm kơ̆ dơn cíñ trị, kơ̆ kơl jăp tềng đăp mờ ală bơta gơtìp kal ke.