Dùl tàm ală bơta pơnrơ tàm lơh jăt Jơnau lơh nền tàm pơrjum sồ 18 tàm càr Dăk Lăk là ală broă lơh tơmŭt bal, tơrgùm bal ală anih lơh broă, mpồl lơh broă sră pơ àr gơnoar ătbồ dê nàng kờñ tơrmù dipal mpồl lơh broă mờ ờ gŏ lơh gơmù cồng nha broă lơh. Ồng Trương Hoài Anh, Kwang Lam bồ Sở Yal tơnggĭt mờ Mblàng yal jơnau càr Dăk Lăk, pà gĭt broă tơmŭt bal Sở Yal tơnggĭt mờ Mblàng yal jơnau bal mờ Sở Jak chài Măy mŏk neh geh lam lơh dồ bă ndrờm bal mờ geh cồng nha. Jơh bal bàr sở neh bơyai lơh uă dơ̆ pơrjum nàng ring bal gùng dà broă lơh tơmŭt bal, cih Ală jơnau neh lơh nền pơyua mpồl lơh broă in lài mờ ngai 10/01/2025. Ồng Trương Hoài Anh, đơs: “Sở neh yal ai jơh ală kwang bàng, kông cưk, viên cưk mờ cau lơh broă tàm jơh gùt anih lơh broă in. Gơ wèt mờ broă tơmŭt bal 2 sở là Sở Yal tơnggĭt mờ Mblàng yal jơnau bal mờ Sở Jak chài Măy mŏk den Anih duh broă càr neh lơh 1 mpồl lơh broă mờ tus tŭ do neh pơrjum mờ 2 gah neh cih Ală jơnau neh lơh nền mờ yai mpồl in lài mờ ngai 10/01/2025 mờ rơ̆p pơrjum mpồl nàng ring bal Ală jơnau neh lơh nền lài mờ ngai 15/01 nàng yal Anih duh broă càr in mờ Tỉñ ủy càr in jăt jơnau sồr”.

Tàm kơnhoàl Cư M’gar, ồng Trần Đình Nhuận, Ƀí thư Huyện ủy kơnhoàl kung pà gĭt lơh jăt Jơnau lơh nền tàm pơrjum sồ 18, Cư̆ M’gar neh tơmŭt bal Anih tờm niam chài tàp pràn să jan mờ Anih sơñio rùp pờ tơlik jơnau đơs, tơmŭt bal geh 8 mpồl lơh broă hìu bơsram, gơmù 8 thôn ƀòn mờ sền bal gơmù geh 10% kwang bàng cau lơh broă sa priă nhai dà lơgar tàm jơh gùt kơnhoàl. Tàm tơngai tus, kơnhoàl Cư M’gar dan uă broă rơndăp lơh tơmŭt bal ndai, bè tơrgùm bal ală Anih ròng phan, tam phan, sền gàr phan tam gơgơs dồ Anih tờm Drơng broă ala broă lơh sa sươn sre gơ wèt kơnhoàl…Ală tam gơl do ờ mìng gơmù anih lơh broă bơh sơnrờp mờ gam dong ală anih lơh broă, mpồl lơh broă lơh broă geh cồng nha rlau. Ồng Trần Đình Nhuận, đơs: “Duh broă sùm Huyện ủy kơnhoàl neh tam tìp mờ ală oh mi geh sơnam gam hơđơm 05 sơnam nàng lùp kờñ gĭt jơnau kơlôi sơnơng bơta kơ̆p kờñ mờ lơh broă lơh bồ tơnggoh nàng hòi jà ală kwang bàng rê rlô lơh broă lài mờ sơnam ai rê rlô geh dờp bơta dong kờl jăt jơnau sồr, tus tŭ do geh 1 nă oh mi Lam bồ Cơldŭ mờ 5 nă oh mi phó lam bồ mpồl, phó lam bồ cơldŭ neh geh sră dan rê rlô lơh broă lài mờ sơnam ai rê rlô”.

Ồng Bạch Văn Mạnh, Kwang Lam bồ Sở Broă tàm dơlam is càr dê kung đơs nền, tơnơ̆ 7 nam lơh jăt Jơnau lơh nền tàm pơrjum sồ 18, càr Dăk Lăk neh gơmù geh 10% nă cau lơh broă sa priă nhai dà lơgar pơndrờm mờ nam 2015, gơmù 30 cơldŭ, ci kụk gơ wèt ală sở mờ gơmù 40 cơldŭ mờ mpồl lơh broă ndrờm pal gơ wèt ală ci kụk. Do là dùl broă lơh geh pal cih dờp, ờ mìng tơnggŏ bơta lơh ngan jơh nùs tàm broă tơrmù mpồl lơh broă lơm mờ gam gàr niam cồng nha ătbồ tàm tŭ ală jơnau sồr ngai sơlơ uă gơ wèt mờ mpồl lơh broă dà lơgar dê. Tàm tơngai tus, càr Dăk Lăk pơn jăt tai lơh jăt ală broă rơndăp lơh tơrgùm bal, tơmŭt bal bàr pe sở, gah nàng kờñ tơrmù anih lơh broă tờm mờ tơngguh uă cồng nha ătbồ. Ồng Bạch Văn Mạnh pà gĭt: “Bol hi neh lơh sir jơh ală tơnggume tờm bơh chờm mờ mpồl lơh broă rơndăp broă tơnggume gơgơs. Anih duh broă Làng bol càr neh sồr Sở Broă dơlam is càr pơgồp bal mờ ală gah geh gơnoar lơh 8 mpồl rơndăp tăp sèng pồ tơl tàm hơ̆ jà oh mi Củ tịc mŭt bal tàm 2 mpồl mờ ală oh mi Phó Củ tịc Anih duh broă Làng bol mŭt bal tàm ală mpồl nàng ring bal dồ nùs bal. Uă mpồl kung neh pơrjum ring bal rao. Tŭ tơngai sơrbac mhar, mhar ngan”.

Tỉñ ủy càr Dăk Lăk neh gĭt nền broă lơh jăt Jơnau lơh nền tàm pơrjum sồ 18 là kơnòl broă kwơmàng ngan, ờ gơtùi lời jŏ. Ồng Nguyễn Đình Trung, Ƀí thư Tỉñ ủy càr, đơs nền: “Do là dồ dơ̆ tam gơl bơta yau gơgơs bơta pa bè tơrmù mpồl lơh broă, sơlơ lơh mhar sơlơ geh kwơ ai bơta bơtàu tơngguh bơh dà lơgar dê in”. Càr Dăk Lăk đòm jăt jơnau đơs “ntoăt ndang săp sèng ndang”, tơrgùm tàm broă lam lơh jăt kơnòl broă mờ bơta lơh ngan jơh nùs ngan, mơkung gàr geh bơta ndrờm bal, ring bal đah ală kâp gơnoar ătbồ bơh Dà lơgar tus ƀòn lơgar: “Tam gơl pa, rơndăp tăp sèng rơndăp mpồl lơh broă bơh ală anih lơh broă cíñ trị dê tơrmù, lơh broă gơtùi, geh cồng nha là kơnòl broă kwơmàng ngan, là dơ̆ tam gơl bơta yau gơgơs bơta pa bè tơrmù dipal rơndăp mpồl lơh broă bơh ală anih lơh broă dê, bal mờ uă ngan kal ke, ờ ƀươn soh, mhar gơrềng tus gơnoar kwơ, bồ tơnggoh, nùs nhơm bơh kwang bàng, công cưk, viên cưk, cau lơh broă dê tàm jơh ală anih lơh broă cíñ trị. Gơ sồr pal geh bơta tam klăc, ring bal, dồ nùs bal, lơh ngan jơh nùs uă tài bơta kwơ bal càr dê”.

Mờ bơta lơh ngan jơh nùs bơh jơh ală anih lơh broă cíñ trị dê, bơh càr tus kơnhoàl, mờ bơta sồr lơh jơh nùs jơh tồr bơh ală kâp đơng lam bồ dê, Dăk Lăk gam lơh ngan lơh jăt Jơnau lơh nền tàm pơrjum sồ 18 bal mờ nùs nhơm “tam gơl pa, rơndăp tăp sèng rơndăp mpồl lơh broă bơh ală anih lơh broă cíñ trị dê tơrmù dipal, lơh broă gơtùi mờ geh cồng nha”. Ală cồng nha pà gŏ bơta lơh ngan jơh nùs, dồ nùs bal, ờ ngòt kal ke, càr Dăk Lăk rơ̆p pơn jăt tai lòt di gùng mờ lơh geh bơnàng jă kơnhăp ai bơta bơtàu tơngguh tơnơ̆ do in.