Thủ tướng Cíñ phủ pà git, tơnơ̆ mờ tŭ tơnguh kấp bơta git gơ̆p Tam klăc bal jŏ jòng tơl ală bơta, bơta git gơ̆p đah lơgar Việt Nam mờ lơgar Mỹ pơn jăt tai bơtàu tơnguh nền nòn, mùl màl, ai geh bơnàng jă kơ̆ kơl jăp ai broă lơh sa, kă bro phan, bơcri priă mờ lơh broă bal tơl ală bơta tàm ală gah broă ndai đah bàr lơgar dê.

Tàm nam 2024, uă mpồl lơh sa kă bro dờng lơgar Mỹ geh jơnau kờñ bơcri priă mờ rề ơnàng bơcri priă tàm lơgar Việt Nam; lơh broă bal đah bơto bơtê mờ bơsram, Thủ tướng sồr Tập đoàn Berggruen Holdings kơlôi sơnơng bơcri priă tàm ờ uă rơndăp broă lơh geh bơta kwơ niam chài, jơnau kah yau, pơgồp bal tàm broă yal bơta niam chài lơgar Việt Nam tus tàm lơgar bơdìh, lơh gơcèng bơta ală lơgar bơta niam chài krơi is jơi bơtiàn lơgar Việt Nam dê. Ring bal mờ jơnau kờñ bơh Thủ tướng Cíñ phủ dê, ồng Nicolas Berggruen pà git, tập đoàn Berggruen Holdings tŭ lơi kung rơcang lơh broă bal, bơcri priă, dong kờl lơgar Việt Nam tàm broă bơto cau lơh broă, tềng đăp măt dong kờl pơlam lơgar Việt Nam lơh geh dùl kes priă nàng bơcri bơtàu tơnguh, di pal mờ broă bơtàu tơnguh jŏ jòng lơgar Việt Nam dê, mờ gùng dà broă lơh mờ Đảng Kộng sản lơgar Việt Nam neh ai là cèng geh rài kis ngai sơlơ hờm ram, gơboh gơbài rơlao ai làng bol in.