Jờng rơ ală broă lơh bơh sơnrờp pal pơn jờng ngan, Tổng Ƀí thư ồng Tô Lâm đơs sùm, tơngai tus, Ling mpồl 34 pal pơn jăt tai bơsram mờ lơh jăt niam Jơnau sồr sồ 35 bơh Ƀộ Cíñ trị dê bè Pơrjum dờng Đảng ală kâp wèt tus Pơrjum dờng cau ala măt gùt lơgar dơ̆ XIV Đảng dê. Tơrgùm rơcăng mờ bơyai lơh geh cồng nha Pơrjum dờng Đảng ală kâp tơngai bơh nam 2025- 2030, lơh bè lơi pal mùl màl làng bol lơh tờm, tam klăc, ring bal. Pơgồp bal niam broă pồ tơl kâp ủy mpồl đảng mờ pồ tơl mpồl kwang bàng mờ anih lơh broă, mpồl lơh broă, nàng lơh bè lơi tơnơ̆ pơrjum dờng, ală mpồl đảng sơrbac mhar lơh jăt niam gơnoar broă đơng lam mpồl lơh broă bơsong kal ke, lơh gơs jak ngan kơnòl broă, pơgồp bơnah bơ̆t bơtàu mpồl đảng sàng goh pràn kơnhăp bè cíñ trị, bồ tơngoh, nùs nhơm, mpồl mờ kwang bàng, bơ̆t bơtàu mpồl lơh broă pràn kơnhăp tơl làm “lơh krơh niam, pơnrơ ngan”.

Mho dồ ngai bal, Tổng Ƀí thư ồng Tô Lâm lòt còp mờ lơh broă mờ Mpồl ling 15 bè cồng nha lơh jăt kơnòl broă lơh sa- mpồl bơtiàn Sền gàr dà lơgar lơngăp lơngai.