Jăt jơnau yal, nam 2024, bŭ lah gơtìp bă kal ke, mơya càr Dăk Nông kung gam lơh geh ală cồng nha niam tàm broă bơtàu tơnguh lơh sa mpồl bơtiàn. Tă priă bơcri bơh dà lơgar càr Dăk Nông ơm lài ngan Tây Nguyên dê mờ khà geh 90% tàm khà 3 rơbô 500 tơmàn đong priă broă rơndăp lơh geh ai.

Tơrmù rơƀah càr dê pơn jăt tai geh tàm mpồl lam lài gùt lơgar, tŭ do gam di pơgăp 3% khà hìu rơƀah. Geh tơnhào, tăc geh priă ală bơta phan geh lơh bơh broă lơh sa suơn sre tờm bè kơphe, tiêu, sầu riêng dong kờl geh priă tơl nă cau gơguh uă ngan bơh lài tus tŭ do, tŭ do neh geh 81 tơlăk 600 rơbô đong tàm 1 nă 1 nam, ơm dơ̆ bàr tiah Tây Nguyên (tơnơ̆ càr Lâm Đồng). Ồng Hồ Văn Mười, Củ tịc Anih duh broă Làng bol càr Dăk Nông pà git, nam 2025 càr rơ̆p lơh bơh 1 tus 4 hìu măi lơh ƀôsit trà, priă tơl nơm hìu măi mờr 1 tơmàn dolar Mỹ. Mờ priă bơcri geh di pơgăp 8 tơmàn dolar Mỹ, rơ̆p lơh geh bơta niam ai càr Dăk Nông in bơtàu tơnguh pràn kơl dang rơlao tàm tơngai tus.