Mùl màl, mò Nguyễn Thị Thu Nguyệt, Bí thư Thị ủy ƀòn drà dờng Buôn Hồ geh ntrờn sồr mờ ăt gơnoar broă Phó Lam bồ mpồl drơng kơnòl broă Mpồl Cau ala măt Quôk hội càr Dăk Lăk, kờp bơh ngai 06/01/2025. Mpồl Lơh kơnòl broă sùm Tỉñ ủy càr kung yal jơnau lơh nền ntrờn sồr, jàu broă mờ rwah mò HYim Kđoh, Kwang bàng tàm Tỉñ ủy càr, Phó Củ tịc Anih duh broă Làng bol càr, ăt gơnoar broă Ƀí thư Thị ủy ƀòn drà dờng Buôn Hồ, tơngai lơh broă bơh nam 2020- 2025, sơnđờm bơh ngai 06/01/2025. Mò H Yim Kđoh kung geh rwah mŭt bal tàm Mpồl duh broă Đảng ƀộ ƀòn drà dờng Buôn Hồ mờ Mpồl Lơh kơnòl broă sùm Thị ủy ƀòn drà dờng Buôn Hồ.

Ƀí thư Tỉñ ủy càr ồng Nguyễn Đình Trung chờ gờm mờ cih dờp ală tă pơgồp bơh ală oh mi Nguyễn Thị Thu Nguyệt mờ H Yim Kđoh dê tàm broă lơh, mơkung kơ̆p kờñ ală oh mi tàm gơnoar broă pa rơ̆p pơn jăt tai ngui niam bơta pràn jak, tam klăc bal mờ mpồl lơh broă lơh jăt geh cồng nha ală kơnòl broă.