Pơrjum tơrgùm cri bơyai broă tơn jơh lơh broă bơh Anih duh broă Atbồ priă Dà lơgar tàm mpồl lơh sa kă bro mờ broă tam gơl gơnoar, kơnòl bơh ala măt cau tờm ngui Dà lơgar gơwèt mờ 19 tập đoàn, kông ty dờng; broă rơndăp tăp sèng, rơndăp mpồl lơh broă bơh Tổng kục Tơrgùm kờp dê.

Tơnơ̆ mờ tŭ iăt ală jơnau đơs,  đơs pơn dŭt, Thủ tướng ồng Phạm Minh Chính pà git, tàm broă bơtàu tơnguh, cíñ phủ neh jăt ngui ală broă lơh tơrlòng lơh krơi is tàm broă atbồ mpồl lơh sa kă bro Dà lơgar, atbồ priă Dà lơgar tàm mpồl lơh sa kă bro di pal jăt tơl tơngai. Jăt Thủ tướng Cíñ phủ đơs, nam 2025, gùt lơgar lơh ngan gơguh lơh sa geh ờ uă ngan 8%, ai geh bơnàng jă ai rài bơtàu tơnguh 2 nơm sồ jăt pơn jăt tai. Den tàng ală ƀộ, gah lơh broă dà lơgar, ală càr, ƀòn dờng, mpồl lơh sa kă bro pal gơguh êt ngan 8%; broă rơndăp tăp sèng broă tơrlòng lơh, bơyai lơh wơl gơwèt mờ ală tập đoàn, kông ty dờng Dà lơgar dê pal tàm nùs nhơm “ai bơta kwơ dà lơgar jơi bơtiàn gơguh rơlao jơh, lài rơlao jơh” nàng priă Dà lơgar geh atbồ niam ngan mờ bơtàu tơnguh niam ngan, drơng ai broă bơtàu tơnguh dà lơgar tàm rài pa in.