Mờ tơnggume tờm “Ai tơl bơta ring bal ùr klau mờ lơh jăt niam gơnoar broă bơh kwang bàng, cau ùr tàm mpồl mờ cau ùr dê tàm bơtàu tơngguh lơh sa- mpồl bơtiàn tàm ù tiah càr Dăk Lăk”, pơrjum geh lơh tàm nùs nhơm khăt gơboh tă pơgồp jơnau đơs, duh hồl, song dơ pă. Ală broă gơrềng tus gùng dà broă lơh dong kờl nàng pơn jờng, dong kờl cau ùr sơnđờm mŭt lơh broă bơtàu tơngguh lơh sa; bơ̆t bơtàu ƀòn lơgar pa; ring bal ùr klau; gàr niam rài kis lơngăp lơngai rài kis mpồl bơtiàn ai cau ùr in; broă lơh kwang bàng gơ wèt mờ cau ùr; broă rơndăp lơh gàr niam lơngăp lơngai ai cau ùr mờ kơnòm dềt in…geh cau ala măt sền gròi geh jơnau lùp. Ala măt ală sở, mpồl, gah broă geh gơrềng neh lùp, yal mờ hơ tơn.

Mò H Yim Kđoh, Phó Củ tịc Anih duh broă Làng bol càr Dăk Lăk đơs, ală tơnggume cau ala măt đơs gơcèng jơnau gơlik geh pah ngai, rềp mềl ngan mờ rài kis, tơnggŏ bơta sền gròi bơh cau ùr dê gơ wèt mờ ală broă bơh rài kis, cíñ trị, mpồl bơtiàn dê. Bơh hơ̆, đơs nền bơngă, gơnoar broă, kơnòl bơh cau ùr dê tàm ală broă lơh broă.