Phó Thủ tướng ồng Lê Thành Long, Củ tịc Mpồl Duh broă đơng lam pơgồp bal Tiah Ring dà dờng Cửu Long đơng lam pơrjum. Jat Jơnau yal bơh Ƀộ Broă rơndăp lơh mờ Bơcri priă, nam 2024, bơta bơtàu tơnguh lơh sa mpồl bơtiàn bơh Tiah Ring dà dờng Cửu Long dê lơh geh uă cồng nha pal cih dờp. Khà gơguh lơh sa bơh Tiah dê lơh geh 7,31%, jơnhoa rlau mờ khà gơguh kờp bal jơh gùt lơgar dê (pơgăp 7%). Uă rơndăp broă lơh, broă lơh bơt bơtàu tờm tàm tiah do dê geh lam lơh, bơt bơtàu, lơh geh bơta ƀuơn ai tàm tơrbŏ bal tàm dơlam kơnhoàl ù tiah, ală tiah dê. Mơya, lơh sa- mpồl bơtiàn jơh gùt tiah gam uă kal ke, broă lơh sa kơnhoàl ù tiah gam dềt; 12 tàm 13 tiah tàm Tiah do ờ hềt tàm pơnring is rề mờ tă dia, broă lơh gơguh lơh sa ờ hềt ngan ngồn kơ̆ kơl jăp. Bơta gơmŭt dà hăng gơguh mhar, gơ lam tus bơta ờ tơl dà bè ờs ngui tàm rài kis pah ngai mờ lơh broă sa in.

Đơs pơpndŭt pơrjum, Phó Thủ tướng ồng Lê Thành Long sồr ală tiah pal lơh ngan lơh jat kơnòl broă đơng lam pơgồp bal kơnhoàl ù tiah, bơsong ală bơta lòng gam geh tŭ do. Gơwèt mờ ală rơndăp broă lơh tờm bơh Tiah do dê tàm tơngai tus, pal lơh lài ai priă bơcri ai ală rơndăp broă lơh kwơ màng Dà lơgar, rơndăp broă lơh bơt bơtàu tờm pơgồp bơnah sơlơ bơtàu tơnguh tai lơh sa- mpồl bơtiàn mhar, kơ̆ kơl jăp.