Tàm hìu lơh broă bơh Mpồl lơh broă bal lơh sa suơn sre broă lơh drơng ala ndrờm bal Ea Tu dê, kwang atbồ ồng Trần Đình Trọng rơlĕ sền wơl tơl thùng phan kơphe lài mờ tŭ pơyoa tus anih ơhò ơm dà lềng nàng tăc tus lơgar Mỹ. Rềp tềng hơ̆, bàr nă cau lơh broă gam sơrbăc ngan tam cah is, dăp kơphe ƀòk nàng jào cau năc pa blơi bơh tàm internet in. Nền nòn dăp phan, mò H’ Ban B'tô, kis tàm ƀòn Ko Tam, sàh Ea Tu, ƀòn dờng Buôn Ma Thuột pà git, pah ngai lơh broă tàm hìu lơh broă do rơ̆ geh pà priă 250 rơbô đong.

Gam bè ờs, mò kung bè ală cau lơh broă ndai lơh broă tàm mpồl lơh broă bal do tơrgùm tàm broă sơnka sền gàr suơn kơphe niam ngan. Mò H'’Ban B'tô chờ hờp yal: "Añ lơh broă tàm mpồl lơh broă bal do bơh nam 2015. Añ lơh jăt bơta chài mờ mpồl lơh broă bal bơto sồr. Kơphe hìu nhă añ kung ờ uă ngan sơl mơya geh priă uă, den tàng rài kis hìu nhă añ kơ̆ kơl jăp”.

Rài kis kơ̆ kơl jăp bơh làng bol kòn cau Rơđê dê tŭ tus bal lơh broă tàm mpồl lơh broă bal là bơta gŏ loh làng ngan, tŭ hìu nhă lơi kung geh broă lơh sa tơl ngui tơl sa kơnờm bơh broă lơh kơphe geh bơta bơkah uă. Lŏ H’ Moan Êbañ, atbồ mpồl lơh broă sồ 2 pà git, kơphe làng bol lơh gơs tŭ tăc ai mpồl lơh broă bal Ea Tu in ndrờm geh pơgồp bal tai bơh 3 tus 4 rơbô đong tàm 1 kĭ pơn drờm mờ priă tăc tàm drà kă bro. Pah nam, làng bol sùm geh bơto sồr bơta chài tam, sơnka sền gàr, bơh broă bơsram tàm pang sră tus mờ broă lơh tàm suơn. Ală priă tă tàm broă blơi phơng sih, sơnơm sền gàr phan tam … geh mpồl lơh broă bal ai, mờ cau tàm mpồl lơh jăt broă sơnka sền gàr kơphe jăt tơngai geh ai loh làng nàng sền gròi bơta bơkah.

Lŏ H’ Moan Êban đơs bè broă sơnka sền gàr suơn kơphe tàm tơngai do bè do: “Tơnơ̆ mờ tŭ tơnhào ală cau tàm mpồl pal sơnka, koh ntê, kleh cồng, tus tơnơ̆ satềp den tuh dà mờ sih phơng. Tŭ kàl mìu tus den kung koh ntê tai mờ koh tơrmù cồng. geh uă tờm kơl dìng uă ir den tờm kơphe ờ geh cồng nha, den tàng he pal sreh tơrmù ƀà. Den tàng he pal ngui bơta chài bơh lài ngan. Tŭ tơnhào tăc ai mpồl lơh broă bal in, kơphe pic plai dum bơh 85 tus 90% den priă tăc geh uă rơlao bơh 3 tus 4 rơbô đong tàm 1 kĭ, mơya kơphe pal geh bơta bơkah uă”.

Kơphe geh bơta bơkah uă là bơta tờm lơh gơs cồng nha ai Mpồl lơh broă bal lơh sa suơn sre broă drơng ala ndrờm bal Ea Tu in, do là tiah geh tus rơlao 90% khà cau là làng bol ờ gal cau. Kwang atbồ mpồl lơh broă bal, ồng Trần Đình Trọng pà git, geh lơh tàm 10 nam lài, bơh 49 nă cau lài ngan, mpồl lơh broă bal neh mhar bơtàu tơnguh tai 260 nă cau pơgồp bal, lơh kơphe bơkah tàm bă ù ơnàng rơlao 300 lồ.

Bơdìh mờ broă pơgồp bal mờ mpồl lơh sa kă bro Đăk Man lơh geh mpồl lơh kơphe tăc mờ lơgar bơdìh, mpồl lơh broă bal gam lơh is kơphe ƀòk tăc tàm drà kă bro điện tử, mờ lơh kơphe bơkah. Pa do, kơphe bơkah bơh Ea Tu dê neh geh tăc tus tơn lơgar Mỹ, dờp geh jơnau niam mờ ală pang sră dan blơi pơn jăt tai.

Sùm tơnguh uă bơta bơkah bơh gar kơphe dê, tŭ do mpồl lơh broă bal gam lơh 19 lồ ù kơphe hữu kơ, geh broă sền nàng git ù nền nòn bơh mpồl lơh sa kă bro lơh broă bal dê. Ồng Trần Đình Trọng yal, mpồl lơh broă bal kờñ rề ơnàng bă ù tam kơphe hữu kơ tus tàm gùt sàh Ea Tu: “Di lah ƀòn lơh kơphe hữu kơ den kal ke mơya lơh jơh gùt sàh den ƀuơn rơlao. Lơh uă ƀuơn rơlao mờ lơh ờ uă tài lơh uă den jơh gùt tiah do ndrờm lơngăp lơngai. Hơ̆ là mpồl lơh broă bal kờñ lơh bè hơ̆, tài di lah lơh mờ ngòt kal ke den ờ git tus tŭ lơi hơ̆ sồng lơh. Kung ndrờm bè tŭ pa lơh mpồl lơh broă bal sơl, añ đơs làng bol gam tam bơrlŭ bal kơphe, tiêu, sầu riêng. Tŭ tam bơrlŭ bal den niam ngan, ai phan tam do dong kờl phan tam ndai in, gơs dùl bă niam, kơ̆ kơl jăp lơh sa”.

Đơs bè mờng chài hòi jà tơrgùm làng bol jơi bơtiàn ờ gal cau tus bal tàm mpồl lơh broă bal, ồng Trần Đình Trọng đơs là, pal ai bơta kwơ mpồl bal ndrờm bal mờ bơta kwơ bơh să tờm dê den hơ̆ sồng kơl jăp. Làng bol git tàm broă tam phan gam ờ uă, mơya ƀuơn là geh nùs nhơm mpồl bơtiàn uă ngan. Ai tơngŏ loh làng ală bơta kwơ tŭ lơh jăt broă lơh, lơh sùm tàm broă hòi jà, bơto sồr, ală cau tàm mpồl neh git mờ lơh geh bal ală gar kơphe bơkah tăc tus tàm drà kă bro dunia.

Ngai 11 nhai 12 nam 2024, phan Ea Tu Café geh jờng rơ tàm Dơ̆ Jờng rơ phan bơna pơnrơ ngan bơh mpồl lơh broă bal dê mờ jào khà jờng Mai An Tiêm dơ̆ sơnrờp nam 2024 geh Mpồl tam klăc mpồl lơh broă bal Việt Nam bơyai lơh. Khà jờng Mai An Tiêm là phan pà di pal ngan gơwèt mờ làng bol kòn cau Rơđê lơh broă tàm Mpồl lơh broă bal Ea Tu dê, jờng rơ cồng nha lơh broă bơceh lơh bơh làng bol kis tàm tiah tam uă kơphe Buôn Ma Thuột dê, wèt tus jơnau kờñ bơtàu tơnguh kơ̆ kơl jăp tài dùl dunia niam bơnĕ rơlao.