Đơs sùm tus gùng dà broă lơh bơh lòt nhơl tŭ do dê là bơtàu tơnguh tơlir mờ kơ̆ kơl jăp, den tàng tàm tơrbŏ bal drơng broă logistics gah rơndeh par- lòt nhơl- tiah tus pal ngui ală jơnau yal tơngĭt ală bơta kơ̆ kơl jăp, tờm ngan mờ kwơ màng ngan rlau jơh là pal lơh geh ală phan bơna drơng broă lòt nhơl niam ngan, cèng wơl “bơta ngoh rơngăc uă” nàng năc lòt nhơl ală lơgar kờñ mờ wơl tus wơl tai tàm lơgar Việt Nam. Den tàng lòt nhơl Việt Nam lơh broă lơi nàng lơh geh bơta ngoh rơngăc bơh năc lòt nhơl dê? Do là broă kờñ lơh mờ pal geh broă lơh kwơ màng lơh jat pa kơ̆p kờñ gơ hòi gơ jà năc ală lơgar tus mờ lơgar Việt Nam ngai sơlơ uă rlau tai bơh Tiến sĩ Võ Trí Thành, Kwang atbồ Viện Kơlôi sơnơng broă lơh kwơ màng mat kă bro mờ tàm pơrlòng, pà gĭt: “Lòt nhơl Việt Nam mờ ală akhar tờm nàng bơtàu tơnguh lòt nhơl, hơ̆ là sền gĭt, lòt sền, dờp geh ală bơta niam, tă pơgồp mpồl bơtiàn. Den tàng, broă ai tơlik là lòt nhơl Việt Nam pal lơh bè lơi, broă lơh bè lơi nàng lơh geh ală bơta bơtàu tơnguh mhar bè nùs nhơm ngoh rơngăc ai năc lòt nhơl in, nàng bơtàu tơnguh kơ̆ kơl jăp. Hơ̆ là bơta bơtàu tơnguh mhar bè ngoh ngăc mờ lòt nhơl dê cèng wơl, gơ ơm tàm bơta di pal mờ bơta niam drơng broă lòt  nhơl”.

Dồ nùs bal mờ nùs nhơm do, ồng Vũ Quốc Trí, Kwang gơnoar cih dờng Ală mpồl Lòt nhơl Việt Nam, đơs broă lơh bơh jơnau đơs bơh lòt nhơl Việt Nam dê là Timeless Charm (Bơta Niam bơnĕ ờ tŭ lơi jơh): “Broă lơh là pal lơh jak chài bè broă lơh ală lơgar dê. Jơnau đơs kung gam gơtùi lời bè ờs (Việt Nam niam bơnĕ ờ tŭ lơi jơh”, mơya broă mblàng yal gơ kờñ rlau tai. Añ đơs là, bơta kwơ màng mat kă bro bơt bơtàu là gơ hòi gơ jà ală lơgar mut bal, den tàng bè hơ̆ ờ lời dà yoan. Bồ tơngoh kơlôi sơnơng bơh bol añ dê là bơta niam bơnĕ bơh Việt Nam dê gơ là niam tàm rài lài do, tŭ do mờ rài tơnơ̆ do. Gơ là bơta niam bơnĕ sơr lèt tŭ tơngai. Ờ gŏ di là khà mờ là bơta niam kis sùm sùm”.

Ai ồng Nguyễn Ngọc Bích - Củ tịc Rustic Hospitality Group, Kwang atbồ tam gơl pa bơceh lơh rơndăp broă lơh lòt nhơl Thuỵ Sĩ tài bơh bơtàu tơnguh kơ̆ kơl jăp đơs là, mờng chài tơnơ̆ uă nam lơh broă lòt nhơl pà gŏ, kờñ bơtàu tơnguh lòt nhơl den ală mpồl lơh sa kă bro pal geh bơta lơh broă bal niam, “bal mờ gơ̆p lòt ngài rlau tai” ala tài “cau lơi pràn cau hơ̆ lơh” bè tŭ do: “Añ tus bal mpồl gĭt uă jrô broă lơh bơtàu tơnguh lòt nhơl tơlir bơh Mekong-startup, den añ gŏ bol he neh geh uă ngan broă lơh mơya kung gam là ală broă lơh bơh bàr pe mpồl lơh sa kă bro lơm. Broă là lơh bè lơi nàng bol he in pơgồp bal ală broă lơh hơ̆, lơh geh ală broă lơh ai mpồl bơtiàn in bơtàu tơnguh tơlir, lơh geh ală anih lòt nhơl tơlir, mờ bơtàu tơnguh tơlir bơh lơgar Việt Nam dê”.

Đơs sùm bè gơnoar bơh mpồl lơh sa kă bro gah rơndeh par tàm ală broă drơng logistics, ồng Lê Tuấn Anh, Kwang atbồ Gah Atbồ lòt nhơl mờ Jơnau đơs Ală lơgar, Hìu bơsram Đại họk Văn hoá Hà Nội đơs là: “Năc ală lơgar tus Việt Nam rlau 80% là mờ gùng rơndeh par. Den tàng bè hơ̆, jơnau lòt nhơl pơgồp bal mờ gah rơndeh par pal geh bơta rềp mềr mờ bơtàu tơnguh. Bơta pơgồp bal đah ală gah kwơ màng ngan. Gah rơndeh par kung là gah yal tơngĭt kwơ màng, tài bơh năc tus Việt Nam là tus mờ gùng rơndeh par. Den tàng bè hơ̆, tàm bơta geh ngan, bơta gơrềng, rùp hin bơh lơgar Việt Nam dê sơnđờm bơh gah rơndeh par, den jơnau yal gah rơndeh par là tiah sơnđờm, tơn jơh mờ wơl rê wơl kờñ pal geh is ồn ngan geh sền gròi”.

Tàm tơngai ngai sơlơ uă Dà lơgar tàm pơrlòng uă ngan nàng gơ hòi gơ jà năc lòt nhơl ală lơgar, den broă lơgar Việt Nam jơh nùs ngui phan bơna bơt bơtàu gah rơndeh par mờ lòt nhơl geh bơta kwơ màng mờ jat broă lơh gùt plai ù dê. Broă sơlơ tơnguh tai sền gĭt mat kă bro lòt  nhơl Việt Nam tàm tiah ală lơgar dê, ngui bơta ƀuơn bơta pràn bè phan bơna bơt bơtàu gah rơndeh par, mờ broă rơndăp lơh Việt Nam gơ gơs anih tờm logistics bềng bơta ƀuơn bơta pràn tŭ ƀlàng rơndeh par Long Thành lơh sir tàm nam 2025, ală mpồl lơh sa kă bro bơh lơgar Việt Nam dê gĭt bal mờ gơ̆p lơh broă bal nàng bơtàu tơnguh lòt nhơl tơlir- mờ ală tiah tus lơngăp lơngai, rềp mềr, lơh geh bơta ngoh rơngăc ai năc lòt nhơl ală lơgar dê tŭ tus Việt Nam mờ kờñ wơl tus wơl tàm lơgar Việt Nam.