Tus tŭ do, rlau 2 rbô lồ chi tam tàm Dăk Lăk ờ tơl dà ƀồm. Tàm hơ̆, geh rlau 1 rbô 300 lồ kơphe, 638 lồ kòi mờ 36 lồ chi tam ndai. Kờp dŭ lài tàm tơngai tus, rơp geh bơh 5 rbô tus 8 rbô lồ chi tam digơlan ờ tơl dà ƀồm dilah bơta trồ prang duh pơn jat tai gam jŏ jòng. Tềng đap bơta gơlik geh kal ke bơh trồ tiah dê, Sở Nông nghiệp mờ Phát triển Nông thôn càr Dăk Lăk bal mờ ală mpồl atbồ broă lơh bơtơt rbòng dà pơgồp bal mờ ală tiah mhar lam lơh ală broă lơh rơcang lài sơndră bơta soat dà nàng tơrmù tus khà lơyah ngan rlau jơh hoàc huơr bơh trồ prang dờng soat dà lơh gơbàn.

Ồng Trịnh Quốc Bảo, Phó Kwang atbồ Kông ty TNHH MTV atbồ broă lơh bơtơt rbòng dà Dăk Lăk pà git, tus tŭ do, tàm khà bă chi tam mờ kông ty drơng ƀồm dà geh rlau 1 rbô 380 lồ chi tam ờ tơl dà, tàm hơ̆ neh sơndră bơta ờ tơl dà ai geh rlau 790 lồ chi tam in, bă chi tam gam wơl gam lơh ngan ơn măi ƀồm ngui dà gam wơl tàm tơnau dà nàng drơng broă rơcang sơndră bơta ờ tơl dà in.