Tàm tiah kah kơlôi Đại tướng ồng Võ Nguyên Giáp, Thủ tướng Cíñ phủ ồng Phạm Minh Chính bal mờ mpồl kwang bàng neh chu ñàng mờ lời dùl phuk kah kơlôi nàng kah ưn ngài huềng Đại tướng ồng Võ Nguyên Giáp mờ ală cau chơt màng neh chơt phi să tàm tiah tam lơh Điện Biên Phủ, Mat sơn đan, bơta chài ngui ling bơh Đại tướng ồng Võ Nguyên Giáp dê – Kwang đơng lam bồ dờng bơh dơ̆ tam lơh, cau bi dờng bơh Ling klàng làng bol Việt Nam dê, kwang ling ndu gơn rơh, cau chài ling klàng mờ cau bơsram jak ngan bơh Củ tịc Hồ Chí Minh dê; bơta tă pơgồp, phi să bơh Đại tướng ồng Võ Nguyên Giáp dê mờ ală cau chơt màng dê rơp sùm cih tàm sră kah yau khin cha jak chài jơi bơtiàn he dê, ling klàng he dê bè dùl jơnau đơs crih jòng gam sùm. 

Pơn jat hơ̆, Thủ tướng Cíñ phủ ồng Phạm Minh Chính bal mờ mpồl kwang bàng neh lòt còp Tiah tềl kah yau Sở đơng lam dơ̆ tam lơh Điện Biên Phủ; còp, pà phan 20 nă ling Điện Biên mờ hìu bơnhă geh sră dong kờl bơh dà lơgar tàm xã Mường Phăng, xã Pá Khoang, ƀòn dờng Điện Biên Phủ.