Dùl anih tus Duh khoai bơtau Hùng ngai 10 nhai 3 jăt tơngai àng kơnhai nam do dê là hìu yàng phờk Tháp Kỳ Quang, tàm xã Đăk Mar, kơnhoàl Đăk Hà, càr Kon Tum. Làng bol kòn cau Sơdàng, Bơnhàr… tàm tiah do sùm tus bal tơn bơh broă rơcang lơh. Bal mờ broă dong kờl Mpồl bơyai lơh broă, wă cau năc, geh uă ùr ơruh klao pơnu gam tus bal pơrlòng ờ uă môn tàp pràn să jan ờs mờng bè droh gai, duĭ che, hào ñjrong ntiar…

Tàm ngai duh khoai, bal mờ broă pơdơng ală bơta phan krơi is, bơkah geh să tờm lơh gơs bè mbar, kơphe, plai chi… tàm jơnang duh khoai ală Bơtau Hùng, làng bol gam dròng cing tamya xoang nàng tơngŏ nùs nhơm chờ hờp git ưn ngài uă ngan ală Bơtau Hùng mờ ală mò ồng lài do neh bơ̆t bơtàu dà lơgar, sền gàr dà lơgar. Bi A Thiếk, kis tàm ƀòn Kon Klốc, xã Đăk Mar, kơnhoàl Đăk Hà pà git: “Pah nam, tŭ tus tàm ngai Duh kah Bơtau Hùng, thôn Kon Klốc bol añ sùm tơrgùm cau kra, ơruh pơnu nàng bơyai lơh dròng cinh, tamya, đơs jơnau pơn đik nàng kah tus ngai Duh kah. Broă bơyai lơh do ờ mìng geh tìp măt bal mờ kwơ màng là tơnguh nùs nhơm tam klăc bal tàm ƀòn. Pah tŭ ƀòn geh lơh chờ, ha là tàm ală ngai kwơ màng dà lơgar dê den pal geh dròng cing, tamya xoang đơs jơnau pơn đik. Kah tus ngai duh khoai Bơtau Hùng, bol añ ờ mìng bơyai lơh tàm dùl ƀòn mờ ală ƀòn ndai kung bơyai lơh sơl, tìp bal nàng bơto bơtê ală rơnàng in git bè bơhiàn “Hùc dà kah tô dà”. Kah tus ală Bơtau Hùng neh bơ̆t bơtàu dà lơgar, kơnờm mờ hơ̆ he hơ̆ sồng geh rài kis hờm ram, gơboh gơbài bè tŭ do”.