Đơs tàm dơ̆ tìp mat, Thủ tướng ồng Phạm Minh Chính neh pơyua jơnau lùp còp đềt mềr, jơnau nting bơr pràn kơldang să jan, jơnau chờ gờm niam ngan rlau jơh bơh Tổng Ƀí thư ồng Nguyễn Phú Trọng dê tus ală wa, ală mơi, oh mi cau ling Điện Biên, ơruh pơnu lam lài, cau pờ gùng, làng bol ală jơi bơtiàn càr Điện Biên neh pơgồp bơnah kuơmàng lơh gơs pha lin kah yau Điện Biên Phủ “tiơng pơn rơ làm gùt dunia, rơnggô gùt plai ù”.

Thủ tướng pà git, ală nam do, mờ bơhiàn “Hùc dà kah tô dà, sa plai kah cau tam chi”, Đảng, Dà lơgar he sùm sền gròi uă ngan mờ đơng lam, sồr lơh niam broă lơh kis git jơnau git adat mờ nùs nhơm geh kơnòl, nùs nhơm ki ngàm mờ bơta git ưn ngài uă ngan, neh geh mờ lam lơh geh cồng nha uă jơnau lơh nền, broă lơh nàng dong kờl ngan ngồn gơ wèt mờ cau ling sồt să, cau ling kòp tê jê să, cau pròc mhàm tờm cau ling chơt màng, ală cau geh màng mờ dà lơgar, sền do là kơnòl cíñ trị kuơmàng, pal lơh sùm mờ geh nùs nhơm đềt mềr, geh kơnòl. Tơngai tus, Thủ tướng sồr ală kâp, ală gah broă lơh, ală tiah pơn jat tai lam lơh niam gùng dà bơh Đảng, bơta dong kờl, adat boh lam bơh dà lơgar dê, sơlơ tơnguh rlau tai broă lơh sền gròi cau ling sồt să, cau ling kòp tê jê să, cau pròc mhàm tờm cau ling chơt màng, ală cau geh màng mờ dà lơgar.