Tàm dơ̆ bơyai lơh, Tơrgùm ală Mpồl lơh sa kă bro càr Dăk Lăk là yal wơl ală broă lơh tàm tơrbŏ, hòi jà kă bro phan, dong kờl tam gơl sồ, pà mhàm dong kờl cau mờ sền gàr niam lơngăp lơngai rài kis mpồl bơtiàn, jờng rơ mờ pà ală mpồl cau, cau nă să geh cồng nha jak ngan tàm broă lơh bơ̆t bơtàu mờ bơtàu tơngguh càr Dăk Lăk.

Ồng Phạm Đông Thanh, Chủ tịch Tơrgùm ală Mpồl lơh sa kă bro càr Dăk Lăk pà gĭt, Tơrgùm ală mpồl hơ pơn jăt tai lơh mpồl cau lơh gùng, dong kờl tă bơsong kal ke, chồl pràn lơh bal mờ tơngguh uă pràn jak broă lơh tàm pơrlòng ai mpồl lơh sa kă bro in.

“Bol hi sền swì gĭt nền loh làng bơta kwơ bơh Tơrgùm ală mpồl dê tàm broă cau tàm mpồl dờp geh bơta lơi, mpồl lơh sa kă bro tàm tơrbŏ geh mờ cau lơi, kal ke lơi geh tă bơsong mờ tŭ niam lơi pờ gơlik. Nàng bơtàu tơngguh mhar, kơnhăp jŏ bol he kờñ pal sơlơ lơh bal tai, tơngguh uă pràn jak ătbồ broă, tam gơl pa măy mŏk mờ bơtàu tơngguh lơh gơlik phan geh bơta kwơ uă, bơ̆t bơtàu măt kă bro phan bơna ƀòn lơgar dê”.

Jăt broă rơndăp lơh bơtàu tơngguh lơh sa làng bol dê lơh is, tus nam 2030, Dăk Lăk pơnđơl geh rlau 29 rbô mpồl lơh sa kă bro lơh broă, kơnhoàl ù tiah lơh sa làng bol dê lơh is tă pơgồp rlau nggùl khà GRDP. Bơta wèt sền tus nam 2045, Dăk Lăk geh jơnau kờñ geh rlau 53 rbô mpồl lơh sa kă bro, tă pơgồp pơgăp 2/3 GRDP.

Nàng lơh geh jơnau kờñ gơguh tai lơh sa bàr nơm khà, Dăk Lăk kờñ pal jòi lơh geh cồng nha ală bơta pràn mpồl bơtiàn, tàm hơ̆ geh gơnoar broă kwơmàng bơh kơnhoàl ù tiah mpồl lơh sa kă bro dê. Ồng Y Nhuần Byă, Phó Chủ tịch Anih duh broă Làng bol càr Dăk Lăk đơs nền, càr rơ̆p pơn jăt tai lòt bal dong mpồl bơtiàn mpồl lơh sa kă bro bơtàu tơngguh.

“Càr sền swì gĭt nền loh làng mpồl bơtiàn mpồl lơh sa kă bro là cau lơh broă bal kwơmàng tàm ală tŭ bơtàu tơngguh. Bơta bơtàu tơngguh bơh mpồl lơh sa kă bro dê kung là gai was cồng nha đơng lam lơh jăt mờ lơh niam wơl tiah bơcri priă kă bro. Càr rơ̆p pơn jăt tai lơh pràn lơh tam gơl pa wơl sră nggal sră pơ àr gơnoar ătbồ, tơngguh uă broă yal loh làng song dơ pă tàm lam lơh jăt tàm sră nggal sră pơ àr gơnoar ătbồ; tơrgùm tă bơsong kal ke, gơkòl bè bơcri priă, ù tiah, rơndăp ù tiah, bơ̆t bơtàu mờ sră nggal gơrềng tus broă lơh sa kă bro; sơlơ tìp măt boh bơr tai, iăt kơno bơsong di tŭ ală jơnau dan dipal ngan bơh mpồl lơh sa kă bro dê”.