
Mho ngai 09/06, tàm Hìu Quôk hội dê, Củ tịc Quôk hội ồng Trần Thanh Mẫn neh đơng lam Dar pơrjum dơ̆ pe Anih duh broă jơnau rơcăng cih tam gơl, bơtơl bàr pe bơta bơh Sơnoa boh lam nam 2013 dê. Củ tịc Quôk hội đơs niam ngan Cíñ phủ, Anih duh broă Mặt trận dà lơgar Việt Nam, Ƀộ Sền gàr adăt boh lam, Ƀộ Kwang àng tàm tơngai lài neh rơcăng lài ai lơh jăt sră nggal lam lơh, pà jàu kơnòl broă, pơlam ală anih lơh broă, mpồl lơh broă lơh jăt jơh nùs geh cồng nha broă ai jơnau đơs, tơrgùm jơnau đơs Làng bol dê pal lơh di tơngai sồr. Ală anih lơh broă yal tơnggĭt jơnau, sră ƀăo neh geh uă jơnau yal, jơnau cih yal tơnggĭt jơnau uă ngan bè broă ai jơnau đơs mờ yal wơl jơnau đơs bơh ală rơnàng Làng bol dê bè jơnau rơcăng cih Jơnau lơh nền tàm pơrjum. Bơh tơrgùm jơh, neh geh rlau 280 tơlak dơ̆ jơnau đơs tă pơgồp jơnau đơs bơh anih lơh broă, mpồl lơh broă, cau nă să is dê bè jơh ală tơngume, bơta sèng tàm jơnau rơcăng cih Jơnau lơh nền tàm pơrjum; tàm hơ̆, kờp bal khà ring bal là 99,75%, bơta do là cơng tàng tơnggŏ loh làng ngan rlau jơh ai jơnau sồr dipal ngan bơh Đảng mờ Quôk hội dê mờ tơnggŏ bơta ring bal, dùl nùs bal uă đah “jơnau kờñ Đảng dê, di nùs làng bol”.

Củ tịc Quôk hội sồr, tơnơ̆ dar pơrjum, ală anih lơh broă mhar lơh sir sră nggal jơnau rơcăng cih Jơnau lơh nền tàm pơrjum dan Quôk hội ring bal tàm tơngai gờñ ngan rlau jơh dilah gơtùi, pơnđơl là ngai 16/06 nàng lơh di tơngai sồr sơrbac mhar bơh broă rơndăp tăp sèng, tơrmù dipal mpồl kwang bàng mpồl lơh broă lơh sră pơ àr gơnoar ătbồ dê mờ lơh jăt broă lơh tơrlòng lài gơnoar ătbồ ƀòn lơgar 2 kâp.
Viết bình luận