Lơh ngan tŭ ngai ơm rơlô lồi poh nàng bơto sồr kòn klao put in git dròng cing gle, bi Y Duyệt Niê, kis tàm ƀòn Phơng, sàh Ea Tul, càr Dăk Lăk yal, do là tŭ tơngai kwơ màng nàng bi bơ̆t bơtàu nùs nhơm mờ oh kòn. Jơh bàr nă ùr bơklao ndrờm lơh pơgru, mơya ndrờm lòt bơto ngài hìu, tơngai lơh broă jơh tơn ngai den tàng sơlơ lơh broă sền gàr oh kòn ờ tŭ lơi ƀuơn.

Bi Y Duyệt Niê pà git, bơto kòn dròng cing ờ mìng nàng gàr niam bơta niam chài kòn cau Rơđê dê, mờ gam là tơrbŏ bal nùs nhơm kờñ gơboh đah ală rơnàng tàm hìu nhă dê: “Hìu nhă sùm tam pà bal ală bơta chờ, ală bơta gơboh gơbài mờ tàm hơ̆ uă ngan là ală broă mờ oh kòn gơtùi lơh den geh tam pà bal. he sùm nting bơto ală kòn song dơ pă, niam. Geh tơngai ru, tàm hơ̆ uă ngan là tàm kàl rơlô bơkang den bơto kòn in dròng cing ngan ha là cing gle mờ nàng kòn he in tìp bal mờ ală bơyô, mờ ală cau dờng sơnam, tàm hơ̆ uă ngan là cau gơtùi git, wă bơta kwơ niam chài ờs mờng kòn cau Rơđê dê”.

Mờ cau lơh ƀăo Đàm Thị Thuần, kis tàm sơnah ƀòn Tân Lập, broă lơh lơh ƀăo neh lơh lŏ sùm lòt lơh broă ngài, tŭ jơ ơm tàm hìu ờ geh uă. Git wă jơnau mờ dong kờl bơh ală cau tàm hìu nhă dê là bơta tờm nàng lŏ lơh ndrờm bal đah broă lơh bal mờ hìu nhă dê.

Lŏ Thuần chờ hờp yal: geh tŭ broă lơh lŏ dê gơs bơta tàm tơrbŏ bal ală cau tàm hìu, lơh geh ală bơta kwơ krơi is ngan: “Añ geh dong kờl uă ngan bơh ală cau tàm hìu nhă dê, tài añ geh dùl hìu nhă gơboh kờñ ngan mờ broă lơh ƀăo. Bơklao añ sùm lơh broă mờ, kòn klao den lơh ngan tŭ ru tàm ală ngai rơlô bơkang kung tus bal ală jơnau cih nàng geh priă mờ ngui ală priă hơ̆ blơi ală phan mờ kòn gơboh kờñ. Ală dơ̆ lòt nhơl bơh hìu nhă ờ mìng là lòt nhơl mờ sền bè dơ̆ lòt mùl màl bơh cau lơh ƀăo dê. Ală jơnau cih geh yal gơlơh bè là broă pơlam nàng lơh tơngu me cih ƀăo bal in”.

Jăt lŏ Nguyễn Minh Trang, kis tàm sơnah ƀòn Tân An, càr Dăk Lăk yal, rài lơi den gơnoar sền gàr nùs nhơm gơboh gơbài kung pal geh broă tus bal bơh đah bàr gah, ờ gơtùi mìng geh dùl đah “gàr ồs” là kơnòl is bơh cau ùr dê. Geh bơta là tàm rài kis tŭ do, cau ùr pal rơndăp broă lơh di pal, mờ bơta kwơ màng là jơh ală cau tàm hìu ndrờm tam pà bal lơm: “Añ kơlôi là broă lơh lơi den cau ùr kung pal là cau kơlôi sơnơng lài mờ geh broă tam pà bal broă lơh di pal tàm hìu nhă, hơ̆, hơ̆ sồng là bơta kwơ màng. Añ kung bơtoah ngan geh dùl hìu nhă git wă bal. Bàr nă ùr bơklao geh tam pà bal broă lơh tàm hìu. Bè broă trŭ piang, pơs wàs hìu đam…, tŭ pơ-ùr ờ ru den bơklao lơh, tŭ bơklao ờ ru den pơ-ùr lơh; mờ oh kòn dờng den kung tus bal dong kờl broă hìu nhă”.

Ồng Lê Phúc Long, Phó Kwang lam bồ Sờh Niam chài, Tàp pràn să jan mờ Lòt nhơl càr Dăk Lăk đơs là, rài kis pa mờ uă bơta gam lơh tam gơl broă lơh bal mờ rài kis tàm hìu nhă. Broă lơh uă rơnàng kis bal ngai sơlơ ờ uă, broă lơh broă bal đah ală rơnàng kung gơtìp tơrmù tài măi mok pa, broă lơh mờ bơta ngài ù tiah dê. Tềng đăp mờ bơta mùl màl do, Đảng mờ Dà lơgar neh tơlik uă gùng dà broă lơh nàng tơnguh broă bơ̆t bơtàu hìu nhă tàm rài pa. Ồng Lê Phúc Long đơs là, tơl hìu nhă pal lơh broă bal nàng ală cau tàm hìu geh đềt mềr bal: “Tŭ do, nàng geh bơh 3 tus 4 rơnàng ơm kis bal tàm dùl hìu nhă den kal ke ngan. Den tàng he pal geh ală broă lơh nàng lơh bè lơi bŭ lah mờ broă lơh gơtìp ờ ru, mờ mpồl bơtiàn bơtàu tơnguh bè tŭ do, mơya kung gam pal geh tơngai ai hìu nhă in. Bơh ală broă lơh bè ală mpồl pơrlòng ai hìu nhă in, ală broă lơh geh nùs nhơm ai hìu nhă in tam pà bal, sền gròi bal, dong kờl bal. Bơh tŭ hơ̆ kơ̆p kờñ lơh bè lơi tàm ală hìu nhă geh broă pơgồp bal, hìu nhă gơboh gơbài, hờm ram den mpồl bơtiàn hơ̆ sồng bơtàu tơnguh”.

Gàr bơta gơboh gơbài hìu nhă ờ geh tàm bơta lơi dờng ơnàng, mờ bơh ală bơta tam pà bal dềt rơhền, bơta git wă mờ nùs nhơm kờñ gơboh bal pah ngai đah ală cau tàm hìu nhă dê. Bŭ lah tàm ƀòn ngài ha là tàm ƀòn drà dờng ur ar cau, mìng kờñ tơl nă cau geh pơgồp bal ờ uă nùs nhơm kờñ gơboh, ờ uă jơnau sền gàr bal den hơ̆ sồng hìu nhă sùm ram, gơs anih kơl dìng niam tàm rài kis bơh tơl nă cau dê.