Tơngai pa do, Đảng ƀộ neh đơng lam mpồl lơh broă lơh sir jak ngan ală kơnòl broă cíñ trị, pơn rơ ngan là gàr kơ̆ gơnoar tờm, lơngăp lơngai tiah nhàr lơgar tềng hơ đang ù gờl mờ tiah dà lềng. Đảng ƀộ pờ 10 ơdŭ bơto pơlam jơnau cíñ trị ai 311 nă đoàn viên jak ngan in, tơmŭt 139 nă đảng viên pa.

Ală broă lơh gàr tơl niam rài kis mpồl bơtiàn bè” dong kờl oh lòt bơsram”, “Kòn ròng Pôs đồng tiah sền gàr tiah nhàr lơgar”, “ATM dà sàng goh tiah nhàr lơgar”... lơh geh cồng nha, dong kờl geh ngan ai làng bol tiah nhàr lơgar in. Mpồl ling kung lơh pràn mblàng yal gơnoar tờm tiah nhàr lơgar, gơ hòi gơ jà rlau 13 rơbô dơ̆ làng bol tus bal. Tơngai lơh broă bơh nam 2025–2030, tàm tơngai tơmŭt bal mpồl lơh broă, mpồl ling sền gĭt pơn jat tai gàr kơnhăp gơnoar tờm tiah nhàr lơgar, bơt bơtàu mpồl Đảng kơ̆ kơl jăp pràn kơl dang, rềp mềr mờ làng bol mờ lam lơh geh cồng nha “jơh gùt làng bol bơsram sồ”.