Mò Rơ Chăm H’Phít, Ƀí thư Đảng ủy sàh Ia Khươl, pà gĭt, làng bol tiah do kơ̆p gơn Gia Lai rơ̆p tam gơl pràn bơtàu tơnguh pràn kơl dang. Tŭ do càr neh geh dà lềng den tàng bơta ƀuơn bơta pràn bơh tiah kơh bơnơm dờng ơnàng rơ̆p geh lơh jat niam: “Tơnơ̆ tŭ tơmut bal, bơta pơgồp bal đah tiah kơh bơnơm mờ bă ù broă lơh sa suơn sre ơnàng ngan rơ̆p pơgồp bal mờ dà lềng den càr Gia Lai rơ̆p geh bơta lơh bal niam ngan bè logistic tàm broă lơh geh bơh broă lơh sa suơn sre, tăc mờ lơgar ndai phan lơh geh bơh broă lơh sa suơn sre, lơh sa dà lềng... Añ đơs là bơta tàm pơgồp bal do rơ̆p pờ gùng ai dùl Gia Lai in geh dùl bơta bơtàu tơnguh pa ngan”.

Ồng Nguyễn Danh, dùl nă cau rềp mềr rlau 40 nam mờ Gia Lai, sền dờp broă tơmŭt bal Gia Lai mờ Bình Định rơ̆p mhar ngan tă bơsong ală bơta kòl yan ai bơta bơtàu tơnguh in. Ală phan bơna drơng broă bơtàu tơnguh năng lượng lơh gơlik wơl, lơh sa mờ măi mok lơh gơlik phan tàm tiah kơh bơnơm Gia Lai, rơ̆p lòt song tơn bơh anih ơhò ơm dà lềng bơh càr dê tus gùng rơndeh lòt mhar rơ̆p geh lơh. Mpồl dờng phan bơna bal mờ rơndeh rơndồ ƀuơn ngan lòt rê. Ồng Nguyễn Danh đơs:“Tŭ tơmŭt bal Gia Lai rơ̆p cèng wơl phan bơna, năng lượng lơh gơlik mờ digơlan tăc phan mờ lơgar ndai bơh anih ơhò ơm dà lềng,  lòt gan 2 ƀlàng rơndeh par halà bơh mpồng tiah nhàr lơgar, mờ ală lơgar Đông Dương lơh geh ală bơta lơh bal bè lơh sa, bè lơh gơlik phan, bè tăc phan mờ lơgar ndai mơkung bơtàu tơnguh ală logistic bơh càr pa dê bơh ală  tiah đah Tô- đah Jum bơh gùng dờng Dà lơgar 1 mờ tiah đah mat tơngai lik mờ đah mat tơngai mut gùng dờng Dà lơgar 19”.

Jat tơrgùm kờp, càr Gia Lai pa geh bă ù ơnàng rlau 21 rơbô kơi sồ vuông, khà kờp làng bol mờr 3 tơlak 600 rơbô nă- ơm tàm mpồl càr geh bă ù ơnàng mờ khà kờp làng bol dờng ngan rlau jơh. Củ tịc Anih duh broă Làng bol càr, ồng Phạm Anh Tuấn đơs sùm, nàng gờñ lơh jat ală bơta ƀuơn, bơta pràn- brê mờ dà lềng, càr rơ̆p tơrgùm tàm 3 bơta tam gơl pràn kwơ màng: tam gơl bơh bồ tơngoh atbồ tus drơng broă, bơh sră pơ àr gơnoar atbồ tus bơceh lơh, mờ ai làng bol- mpồl lơh sa kă bro lơh tờm tàm tơl gùng dà broă lơh. Ồng Phạm Anh Tuấn pà gĭt: “Càr Gia Lai pa là tơmŭt bal bơh 2 ù tiah geh bơhiàn yau, geh uă broă lơh kăc màng dờng màng, bơhiàn niam chài li la uă ngan. Is ồn là nùs nhơm tam klăc bal mờ bơta kơ̆p kờñ brồ guh pràn ngan bal mờ gơ̆p tàm sơm bat tê bal lòt bal lơh broă kràñ cê jơh nùs ndrờm bal geh cồng nha tài dùl rài tơnơ̆ do bơtàu tơnguh ndrờm pal”.

Ồng Hồ Quốc Dũng – Ƀí thư Tỉñ ủy càr Gia Lai pà gĭt, càr lơh ngan lơh jat jơnau kờñ gơguh lơh sa 8% tàm nam do, lơh geh bơta pràn nàng tơngai bơh nam 2026–2031 lơh geh khà gơguh lơh sa 2 khà sồ:“Tơnơ̆ tŭ tơmut bal den broă lơh rài lơh sa bơh càr Gia Lai pa dê pơgăp rlau 250 rơbô tơmàn đông, geh bal dùl tiah kơh bơnơm dờng ơnàng, 134 kơi sồ dà lềng, dùl tiah ring điơm gơs, 2 ƀlàng rơndeh par, anih ơhò ơm dà lềng, geh gùng rơndeh ồs, gùng ù gờl... Tơrgùm tơl làm ală bơta niam trồ tiah, ù tiah ƀuơn ngan, broă gam wơl là lơh bè lơi nàng lơh ngan ngui niam bơta ƀuơn bơta pràn nàng bơtàu tơnguh càr Gia Lai gơ gơs dùl tiah gơguh lơh sa bơh tiah do dê”.

Bơh ală bơta tờm ngan bè bơta pờ gùng lòt rê, bè ƀlàng rơndeh par, gùng rơndeh ồs, gùng dờng Dà lơgar... tus bơta li la uă ngan bơh ù tiah- lơh sa; dà lềng, tiah ring, tiah kơh bơnơm, càr Gia Lai pa geh kơ̆p gơn rơ̆p geh gơnoar broă tề lam gơguh lơh sa tàm tiah tàm gùl lơgar mờ Tây Nguyên tàm tơngai pơn jat tai.