Tơngkah kir sơnrai 80 nam Kăc màng Nhai Phàm, Sơn tờm Dà lơgar ngai 02/09 mờ 80 nam Ngai bơhiàn Kwang àng Làng bol, mang ngai 25/08, tàm Hìu duh broă Cíñ phủ dê, Thủ tướng Cíñ phủ ồng Phạm Minh Chính tìp măt, kah rơngal ală kwang bàng Mpồl Tàm lùp Kwang àng lòt dong kờl tiah tam lơh tiah đah Jum.

Thủ tướng đơs sùm Đảng, Dà lơgar, Làng bol sùm sùm gĭt ưn ngài bơta phi să dờng ngan bơh gĭt nđờ rbô nă kwang bàng kwang àng lòt dong kờl tiah tam lơh, tàm hơ̆ mờr 1 rbô nă oh mi neh khin cha phi să, uă cau gơtìp kŭp jàm, pù pờng, bơtờp sơnơm khih dioxin, sồt să ờ tŭ lơi bời, lời wơl dùl bơnah mhàm ntìng tiah tam lơh. Hơ̆ là bơta hừh nùs, jơtài nùs nhơm kas màng ngan bơh jơi bơtiàn dê mờ mpồl Kwang àng làng bol khin cha jak chài. Thủ tướng sồr ală ƀộ, gah, ƀòn lơgar, is ồn Ƀộ Kwang àng pơn jăt tai đòm jăt bơhiàn “kah tơm wơl dà kơlhề”, sền gròi hìu bơnhă dờp bơta dong kờl mpồl bơtiàn, cau geh dà kơlhề, ngan là kwang bàng kwang àng neh geh tŭ lòt dong kờl tiah đah Jum.