Ngai 25/08/2025, tàm Hìu duh broă Đảng Dà lơgar, Tổng Ƀí thư ồng Tô Lâm bal mờ jơh ală oh mi tàm Ƀộ Cíñ trị lơh broă mờ Mpồl Lơh kơnòl broă sùm Anih duh broă Đơng lam Đảng Ling klàng Dà lơgar, ai jơnau đơs tàm jơnau rơcăng cih sră nggal mờ broă rơndăp lơh kwang bàng yal Pơrjum dờng Đảng ƀộ Mpồl ling klàng dơ̆ XII, tơngai lơh broă bơh nam 2025- 2030.

Tơnơ̆ tŭ iăt jơnau yal, Ƀộ Cíñ trị cih dờp mờ jờng rơ ngan bơta rơcăng jơh nùs, rơcăng lài bơh Anih duh broă Đơng lam Đảng Ling klàng Dà lơgar, ală anih lơh broă geh gơnoar mờ kâp ủy, mpồl đảng ală kâp tàm Đảng ƀộ Mpồl ling klàng. Pơrjum dờng ală kâp tàm jơh gùt ling neh geh bơyai lơh niam ngan, pơnrơ ngan, ai geh uă jơnau bơsram mờng chài sồr lơh, lơh geh cồng nha niam; kwang bàng đơng lam mờ cau ala măt geh pồ gơkờn bal mờ sră pin dờn uă ngan. Anih duh broă Đơng lam Đảng Ling klàng Dà lơgar kung neh rơcăng lài rơcăng niam ngan bè sră nggal, kwang bàng, lơh jăt di nùs nhơm Jơnau sồr bơh Ƀộ Cíñ trị dê mờ bơto pơlam bơh Dà lơgar dê. Ƀộ Cíñ trị đơs sùm sồr pơn jăt tai lơh jăt ală jơnau pơlam gùng dờng, pal lơh geh cồng nha Pơrjum dờng Đảng ƀộ Mpồl ling klàng dơ̆ XII.