Di dơ̆ lòt pơrjum kwang bàng kâp dờng mpồl ASEAN dơ̆ 46, mho ngai 26/5, Thủ tướng Cíñ phủ ồng Phạm Minh Chính neh geh dơ̆ tìp mat Thủ tướng lơgar Lào ồng Sonexay Siphandone. Bàr Thủ tướng ring bal sồr mhar lam lơh 2 rơndap broă lơh tơrbŏ bal gùng lòt kuơmàng là gùng rơndeh lòt mhar Hà Nội – Vientiane, gùng rơndeh ồs Vientiane – Vũng Áng.

Tàm dơ̆ tìp mat, Thủ tướng lơgar Lào ồng Sonexay Siphandone jơh nùs ưn ngài bơta dong kờl niam ngan mờ bơta dong kờl ờ geh bơta pal geh lơi bơh lơgar Việt Nam dê lời ai lơgar Lào in tàm broă lơh tam lơh tơngklàs jơi bơtiàn lài do kung bè bơtàu tơnguh dà lơgar tŭ do; đơs nền, Cíñ phủ Lào rơp pơgồp bal jơh nùs mờ Cíñ phủ Việt Nam lam lơh geh cồng nha, di tŭ tơngai pơrgon ală rơndap broă lơh lơh broă bal kuơmàng đah 2 lơgar, ngan ngồn tơngkah kir sơnrai ală ngai chờ kuơmàng bơh 2 Đảng, 2 dà lơgar dê tàm nam 2025. Bàr Thủ tướng ring bal pơgồp bal jơh nùs lam lơh jat geh cồng nha ală jơnau ringbal kâp dờng đah 2 lơgar; pơgồp bal sền gàr lơngăp lơngai, rơndap tap sèng, ring lơngai mpồl bơtiàn, sơlơ tơnguh tai lơh broă bal sền gàr lơngăp lơngai, dà lơgar, sơlơ tàm tơrbŏ bal 2 rài lơh sa bè phan bơna gùng lòt, năng lượng, viễn thông mờ lòt nhơl, tàm hơ̆ pơn jat tai sồr lam lơh 2 rơndap broă lơh tơrbŏ bal gùng lòt kuơmàng là gùng rơndeh lòt mhar Hà Nội – Vientiane, gùng rơndeh ồs Vientiane – Vũng Áng.