Càr Gia Lai pa bơyai lơh lam lơh broă lơh “Làng bol bơsram nàng git sồ”. Broă lơh do nàng bơto làng bol in git mờ chài ngui sồ tus tơl nă làng bol, tơl mpồl bơtiàn in, tàm hơ̆ uă ngan là tàm tiah ƀòn lơgar, tiah ngài, tiah làng bol jơi bơtiàn ờ gal cau. Jơnau kờñ bơh càr Gia Lai dê là rơcang geh jơnau git wă sồ ai ờ uă ngan 80% kwang bàng, kông cứk, viên cứk in; 100% kơnòm bơsram kấp 3 mờ cau bơsram dờng; bal mờ 80% làng bol tàm sơnam lơh broă in git bè măi mok sồ. Bơto làng bol in git sồ ờ mìng là broă lơh bơh kấp ủy, gơnoar atbồ dê, mờ pal gơs broă lơh geh is, mùl màl bơh gùt làng bol.

Đơs tàm dơ̆ lam lơh, ồng Phan Văn Chiến, cau pơgru bơto tàm Hìu bơsram kấp 3 Chi Lăng, ƀòn dờng Pleiku pà git: “Añ gŏ broă tam gơl sồ geh dong kờl kwơ màng ngan tàm broă bơto bơtê añ dê. Broă bơto tàm internet, tơrgùm jơnau yal kơnòm bơsram in, kờp sồ tàm internet ƀuơn ngan, ala mờ lài do cau pơgru pal cih kờp mờ tê. Geh uă ngan cau pơgru tŭ do neh git mờ măi mok pa, tam hơl sồ mờ ngai sơlơ lơh gơs rơlao nàng di pal mờ bơta pal geh bơh rài kis dê, dong kờl broă bơto geh lơh pa mờ geh cồng nha rơlao”.

Nàng lơh geh ală jơnau kờñ, càr Gia Lai ai geh uă gùng dà broă lơh tờm: Lơh pràn broă mblàng yal bè broă lơh tàm măi mok sồ bal mờ sră ƀăo ờs mờng, lơh geh nùs nhơm “bơsram is, tam gơl is” tàm gùt làng bol; Lơh hìu bơsram, hìu niam chài, hìu sền sră gơs anih bơsram mpồl bơtiàn sồ; Hòi jà broă tus bal pràn kơl dang bơh kwang bàng, đảng viên, mpồl lơh broă cíñ trị mpồl bơtiàn mờ mpồl lơh sa kă bro măi mok sồ.

Tàm càr Dăk Lăk, broă ai broă lơh drơng ala anih priă jền tus rềp mờ làng bol ờ gam là jơnau đơs tai, mờ gam geh ngan tàm tơl ƀòn. Nàng dong kờl làng bol in git ală broă lơh drơng ala niam ngan, anih priă jền Agribank tàm càr Dăk lăk neh bơyai lơh ai ală rơndeh anih priă jền lòt tus tàm ală thôn, ƀòn tiah ngài. Tơl anih lơh broă ntrờn geh bơyai lơh di pal, ngui măi mok sồ, nàng gàr niam lơngăp lơngai tàm broă lơh, mờ tơrmù tơngaibơsong sră nggal. Kơnờm mờ hơ̆, git nđờ rơbô tơmàn đong priă càn sa priă cồng ờ uă geh tus mờ làng bol tàm tiah làng bol jơi bơtiàn ờ gal cau. Ồng Võ Tiến Nam, Phó Kwang lam bồ anih priă jền Agribank tàm càr Dăk Lăk pà git, tus tŭ do priă jơnkah dồs tàm càr do di pơgăp 22 rơbô tơmàn đong, tàm hơ̆ geh uă ngan là ai broă lơh sa suơn sre ƀòn lơgar in: “Mpồl ai càn priă ntrờn tus ală tiah ngài, dong kờl làng bol lòt rê mờ gùng ngài ngan. Bè bơh Nam Ca tus ƀòn drà dềt Liên Sơn, kơnhoàl Lăk ngài 50 kơi sồ. Tŭ bol añ ai rơndeh bơcri priă tus tàm ală tiah ntrờn, làng bol lơh broă sa rơndăp tơngai lơh broă, den broă bơcri priă ƀuơn rơlao. Mơya, kung gam kal ke tŭ lòt tus tàm tiah ngài den phan bơna măi mok ờ hềt di pal”.

Jơnau git wă broă tam gơl sồ là gùng dà broă lơh pal geh, uă mpồl lơh broă bal suơn sre tàm càr Dăk Lăk neh mờ gam rơcang bơsram bal, tàm hơ̆ uă ngan là ngui ală măi mok sồ nàng yal mờ tăc phan. Uă làng bol lơh broă sa ai phan bơh tàm tiah lơh tus mờ cau ngui sa mhar ngan. Mpồl lơh broă bal broă lơh drơng ala lơh sa suơn sre ndrờm bal Cư̆ Dlê Mnông tàm kơnhoàl Cư̆ Mgar, càr Dăk Lăk lài do mìng mờng mờ broă ai sơntìl, phan lơh broă, phơng sih, dong kờl bơta chài nàng làng bol in lơh gơs phan geh niam, mơya tŭ do pal dờp tai gơnoar pa, gơs cau tờm tàm mpồl geh kwơ, tơrbŏ bal broă lơh sa mờ drà kă bro, yal măt kă bro phan kơnhoàl in.

Jăt ồng Thân Cư, Phó kwang lam bồ mpồl lơh broă bal yal, nàng lơh niam kơnòl hơ̆ den pal tam gơl sồ, ngui măi mok sồ tàm broă yal phan neh dong kờl mpồl lơh broă bal geh tus mờ drà kă bro mhar mờ uă rơlao: “He pal tơnguh bơta pràn nàng lơh broă mờ pơgồp bal mờ git ngui măi mok pa, git tàm broă tăc phan, tus mờ drà kă bro, maketing nàng blơi phan tàm drà kă bro nàng ală cau in git phan bơh he dê geh niam lah ờ. Di lah he lơh niam mờ he ờ tam gơl, ờ yal den gơtìp hoàc huơr ngan”.

Tơngai do, mpồl tam klăc mpồl lơh broă bal càr Dăk Lăk neh bơyai lơh uă dơ̆ bơto bè jơnau git wă kă bro tàm măi mok sồ, bơtàu tơnguh măt kă bro, bơ̆t bơtàu rùp rài ai mpồl lơh sa kă bro, mpồl lơh broă bal in. Ồng Lê Văn Dần, Phó Củ tịc Mpồl tam klăc Mpồl lơh broă bal càr Dăk Lăk đơs tờm, tàm bơta drà kă bro tàm pơrlòng bè tŭ do, bal mờ broă lơh pa broă lơh sa, ală mpồl lơh broă bal kung lơh pràn tàm broă ngui măi mok sồ tàm broă yal, tăc phan tàm uă drà kă bro điện tử: “Pơn jăt tai bơto gơs uă ơdŭ nàng ală mpồl lơh broă bal in git ală bơta tờm ngan bơh broă kă bro điện tử AI dê, tơnơ̆ mờ hơ̆ ală ơdŭ bơto nền nòn tus tơl bơta phan. Tài tơl bơta phan rơ̆p geh ală broă lơh bơh tàm broă kă bro phan điện tử krơi is. Nàng ală mpồl lơh broă bal gơtùi ơm tàm mpồl lơh broa bal mờ kung gam gơtùi yal mờ tăc phan tàm internet bơh ală măi mok sồ tŭ do dê. Is ồn là dong kờl nàng ală mpồl lơh broă bal tàm tiah ngài gơtùi tìp bal jơh mờ ală drà kă bro”.

Tam gơl sồ ờ gam là jơnau đơs ngài tai, mờ gam rơhời gơs dùl bơnah kwơ màng tà rài mis, lơh sa mờ atbồ mpồl bơtiàn. Ală broă lơh ngan bơh broă lơh “Bơto làng bol in git sồ” tàm càr Gia Lai ha là ală boă lơh anih priă jền, mpồl lơh broă bal tàm càr Dăk Lăk neh pà gŏ broă lơh ngan bal mờ bơta pràn gơdờp bal pràn kơl dang bơh ală càr tàm Tây Nguyên dê. Tŭ tơl nă làng bol geh jào dơ̆ niam nàng bơsram, geh tìp mờ git ngui măi mok, den tam gơl sồ rơ̆p ờ gam là kơnòl is bơh anih lơh broă, mpồl lơh broă dê tai, mờ neh gơs bơta pràn bơtàu tơnguh tơl ală bơta tàm rài pa, rài brồ să bơh jơi bơtiàn dê.