Gah Lơh sơnơm càr Dăk Lăk tŭ do geh rơlao 6 rơbô 660 nă kwang bàng, kông cứk, viên cứk, tàm hơ̆ 20,5% kwang bàng, ƀak sìh neh jơh bơsram đại họk mờ tơnơ̆ đại họk. Gùt càr geh 92,3% hìu sơnơm sàh geh ƀak sìh drơng broă mờ 100% hìu sơnơm sàh geh măi tíñ tơrbŏ bal internet, ngui phần mềm atbồ lơh sơnơm.

Tàm hơ̆, khà hìu sơnơm sàh geh Jơnau kờñ dà lơgar tơngai tus nam 2030 neh sơrlèt mờ jơnau geh ai. Tềng đăp mờ ală bơta lòng bơh kòp gơtờp ngòt rơngơ̆t bè Kòp pluh A H1N1, kòp Ebola, Mers-CoV, SARS mờ is ồn ngan là kòp COVID-19, gah lơh sơnơm càr Dăk Lăk neh pơgồp bal nền nòn mờ ală anih lơh broă, mpồl lơh broă lơh jăt ală gùng dà broă lơh pràn, kơrian geh cồng nha. Di pal mờ jơnau kờñ sền gàr bơta pràn kơl dang să jan ngai sơlơ uă bơh làng bol dê, gah lơh sơnơm càr Dăk lăk neh rơcang ngui ală bơta chài lơh sơnơm pa bè plai nùs gùng mhàm, jồr mhàm, reh nội soi, tơrmù uă ngan ai ală hìu sơnơm dờng in. Mờ ală cồng nha neh lơh geh, gah lơh sơnơm càr Dăk lăk neh geh jào Gai lòng Lơh broă ală khà, Bồng bi pơrlòng jăk ngan, bal mờ uă sră jờng rơ bơh Thủ tướng Cíñ phủ, Ƀộ Lơh sơnơm; Uă cau lơh sơnơm jăk geh jờng rơ.