Bơh tŭ gam dềt, A Thu neh kờñ ngan ală sap ntas bơh đờng goòng kòn cau dê. Ồng lòt sền ală dơ̆ lơh chờ, lơh yàng ƀòn dê nàng bơsram bơta chài ngui, nhơl đờng goòng. Dùl tàm ală tă pơgồp pơn rơ ngan bơh A Thu dê là broă jòi, mòn mờ nhơl đờng lŭ – dùl bơta đờng goòng yô yau ngan bơh Tây Nguyên dê. Ồng neh lời uă ngan kơlôi sơnơng, jòi alà pơnai lŭ geh sap ntas krơi is nàng mòn gơs bòr đờng lŭ. Ờ mìng bè hơ̆, A Thu gam bơceh, pơgồp bal đờng lŭ mờ ală bơta đờng goòñg ndai, lơh gơs ală sap ntas tàm bơrlŭ krơi is ngan, dờp geh bơta sền gròi bơh uă cau kờñ gùng đơs crih dê. Ồng pà git: “Añ neh lòt làm bă tiah, añ gŏ khi mòn, hơ̆ sồng nhơl đờng goòng, dròng cing jañ mồng mờ tam ya xoang chờ hờp ngan. Añ gŏ khi mòn đờng goòng jak ngan, bơh hơ̆ añ neh kơlôi sơnơng, bơsram hơ̆ sồng tề lam làng bol bơsram dròng cing jañ mồng, teh đờng lŭ, nhơl đờng Klông pút, đờng T’rưng… Tàm bồ añ dê sùm sơnơng là, khi lơh gơtùi den he kung lơh gơtùi sơl, añ neh pơnđơl is pràn hơ̆ sồng tề lam làng bol gơtùi sơl”.

Git uă bè bơta kuơmàng bơh broă prap gàr niam chài, ồng A Thu neh lời uă tŭ tơngai mờ nùs tồr nàng bơto wơl cau kơnòm să in. Ồng ờ mìng pơlam bơta chài nhơl đờng goòng mờ gam tam pà ală jơnau yal, jơnau gơtha tàm tơl gùng đơs crih. Kơnờm bơh hơ̆, uă ơruh pơnu, kơnòm pa tàu tàm ƀòn neh git mờ đòm jat bơhiàn ờs mờng, lơh li la tai bơta niam chài kòn cau Sơdàng dê. Ồng A Thu chờ hờp yal: “Ală kơnòm bơsram gŏ gơ lơh chờ hờp ngan tŭ geh añ tề lam ală oh lòt pơrlòng tàm kơnhoàl, tàm càr, den ală oh đơs là chờ hờp ngan mờ kờñ ngan, geh lòt pơrlòng nàng ai tơnggŏ bơta kờñ gơboh să tờm he dê gơ wèt mờ cing mồng, geh tìp mat mờ bơsram đòm jat uă. Pah dơ̆ geh tŭ lòt pơrlòng, añ lam ală oh lòt pơrlòng den ală oh chờ hờp ngan”.

Tàm thôn Đăk Rô Gia, ồng neh lơh dùl mpồl cing mồng, tamya xoang mờ 30 nă cau tàm mpồl, sùm tus bal ală broă niam chài dờng tàm càr mờ bơdìh càr. Bơdìh hơ̆ tai, ồng A Thu gam mòn mờ nhơl ală bơta đờng goòng gle đơr ờs mờng bè ting ning, klong pút: “Bơh tŭ gam dềt añ neh lòt jat ală cau chài dròng cing, iat sap cing añ gŏ gơ lơh chờ hờp ngan. Bơh hơ̆ añ neh pơnđơl pràn bơsram uă ngan tàm ală cau chài bè bơta chài dròng cing jañ mồng. Tus tŭ do, añ neh pơlam mờ bơto jơh nùs ngan làng bol mờ ală kơnòm bơsram tàm jơh ală hìu bơsram tàm kơnhoàl, tàm sàh mờ tàm ƀòn in. Tŭ do, añ bơto uă ngan ală hìu bơsram, hìu bơsram ơm sa ngai, hìu bơsram ơm tơn hơ̆ sồng hìu bơsram kâp 2, ală thôn tàm sàh mờ ală sàh, kơnhoàl ndai tai. Añ sùm gŏ chờ hờp ngan tŭ sap cing geh mpong ntas, bè hơ̆ den tàng añ neh pơlam mờ bơto jơh nùs ngan ai ală cau bơsram in, bal mờ hơ̆ den cing mồng là niam chài kòn cau dê den tàng he pal sền gàr”.

Mờ bơta chài, bơta jơh nùs, ồng A Thu sùm geh jà tus bal nhơl đờng goòng tàm ală dơ̆ lơh chờ niam chài tàm càr mờ bơdìh càr. Ală jơnau bơyai lơh ồng dê sùm lời wơl jơnau kah kir niam ngan, pơgồp bơnah yal tơnggit niam chài kòn cau Sơdàng tus mờ làng bol. Bơta geh mat ồng dê tàm ală dơ̆ bơyai lơh ờ mìng là bơta pơn yờ să bơh ƀòn Đăk Rô Gia dê mờ gam là cơng tàng ai bơta niam ngan bơh niam chài bơh yau kòn cau dê tàm rài kis pa tŭ do. Mờ ală bơta chài, bơta jơh nùs mờ bơta tă pơgồp ờ git glar bòl, ồng A Thu neh geh dà lơgar pà khà jờng cau chài jak ngan: “Bơh tŭ añ tề lam mờ bơto làng bol in bơta chài dròng cing jañ mồng, tŭ do dà lơgar neh dờp ngan là cau chài jak ngan bơh nam 2019. Bơh hơ̆ tus tŭ do, añ neh bơto ală cau bơsram in uă ngan. Đơs bal là añ geh dờp uă ngan sră cơng tàng tài neh geh dà kơl hề tề lam, bơto bơtê dròng cing jañ mồng ai làng bol mờ ală cau bơsram in”.

Tàm 5 nam do, cau chài ồng A Thu neh bơto tơn dròng cing jañ mồng mờr 25 ơdŭ ai mờr 300 nă cau bơsram ală hìu bơsram mờ ƀòn lơgar gơ wèt ală kơnhoàl Đăk Tô, Sa Thầy, Đăk Glei, Tu Mơ Rông. Mờ kung bơto ai 8 nă cau chài tàm kơnhoàl in bè bơta chài lơh niam m git săp cing mồng. Ồng kơlôi ngan lơh bè lơi nàng dong kờl, tam pà jơnau git wă mờ mờng chài mờ tơl nă cau, pơgồp bơnah bơt bơtàu ƀòn lơgar tam klac bal mờ bơtàu tơnguh: “Bè añ gŏ mpồl bơtiàn tŭ do ngai sơlơ bơtàu tơnguh. Kờp dŭ tơnơ̆ do añ rơp pơnđơl pràn uă rlau tai nàng sền gàr niam chài, bơhiàn niam bơnĕ kòn cau he dê. Tàm bơta pràn he dê, bơta lơi añ git den añ rơp bơto mờ tề lam làng bol mờ ală cau bơsram đờng goòng kòn cau he dê”.

Cau chài ồng A Thu là bơta pơn đàng bơh nùs nhơm prap gàr mờ ngui niam chài bơh yau tàm Kon Tum. Ală tă pơgồp ồng dê ờ mìng dong sền gàr niam chài kòn cau Sơdàng mờ gam sơlơ lơh niam rlau tai anih prap ơn niam chài li la bơh ală jơi bơtiàn Việt Nam dê.