
Ƀòn Kli A, sơnah ƀòn Đạt Hiếu, ƀòn drà dờng Buôn Hồ, ngài mờ ƀòn dờng Buôn Ma Thuột rlau 40 kơi sồ. Ƀòn tŭ do geh 276 hìu làng bol ơm kis, jơh ală là cau Rơđê lơm, gam prăp gàr geh uă bơhiàn niam chài bè cing mồng, đờng goòng jơi bơtiàn dê, ală dơ̆ lơh yàng lơh chờ mờ bàr pe broă lơh ờs mờng bơh yau. Bơh nam 2023, ƀòn Kli A neh geh ƀòn drà dờng Buôn Hồ bơcri lơh broă bơ̆t bơtàu jơh ală bơta bal mờ tiah ơn pơdơng ràng tơlik niam chài, hìu jòng, lơh wơl mờ sền gàr niam wơl dà mbòr.

Nam 2024, Anih duh broă Làng bol càr Dăk Lăk neh rwah ƀòn Kli A mờ 4 hìu bơnhă tàm ƀòn nàng dong kờl mờ lơh sir broă bơcri bơtàu tơngguh lòt nhơl mpồl bơtiàn. Jăt pơlam gùng, ƀòn Kli A rơ̆p bơtàu tơngguh ală phan bơna lòt nhơl mpồl bơtiàn bè lòt sền nàng gĭt, lòt sền gĭt rài kis ơm kis, lơh broă, lơh sa bơh làng bol kòn cau Rơđê dê; lòt sền nàng gĭt niam chài ờs mờng bơh yau bè cing mồng, lơh ai cau in sền jơnau cih đơs crih tam ya làng bol rài yau dê, niam chài trŭ gơm phan sa mờ tìp măt lơh kwèng, tàm tơrbŏ đah ală mpồl bơtiàn; lòt còp sền ù tiah brê bơnơm geh is mờ tàm tơrbŏ ală anih tus tàm gùng lòt lòt nhơl.
Viết bình luận