Jăt đơng lam bồ Anih duh broă Làng bol càr Dăk Lăk dê, nam 2024, lơh sa càr Dăk Lăk dê bulah kung gam sơl uă kal ke mờ ờ lơh geh broă rơndăp lơh neh sồr lơh. Mơya, mờ bơta lơh ngan bơh jơh ală anih lơh broă cíñ trị dê, càr neh lơh geh ală cồng nha niam ngan. GRDP kờp bal dồ nă cau càr dê geh 72 tơlak 800 rbô đong, kờp jơh rề kes priă dà lơgar dê geh 8 rbô 500 tơmàn đong; kờp jơh priă geh bơh tăc phan mờ lơgar ndai kờp dŭ geh 1 tơmàn 650 tơlak dolar Mỹ; kờp jơh priă phan bơna lơh geh tàm ù tiah càr dê jăt giă tŭ do rlau 141 rbô tơmàn đong, lam bồ kơnhoàl ù tiah Tây Nguyên. Tàm broă lơh geh hơ̆, mpồl cau geh bồ tơngoh jak, cau cih jơnau đơs crih tam ya mờ cau lơh ƀăo neh lơh gơnoar broă kwơmàng tŭ neh sùm bơceh lơh- lơh gơlik bơta gơdan jơnau gơkờñ, di tŭ yal tơnggĭt bè tơl bơta rài kis, lơh sa- mpồl bơtiàn, lơh hô hơng nùs nhơm bơceh lơh, tam gơl pa mờ bơtàu tơngguh, sền gàr ală bơta kwơ niam bơnĕ mờ ai tơnggĭt ờ dồ êt bơta ờ niam, bơta ờ hềt dipal. Càr Dăk Lăk kung gam wèt tus dồ nam 2025 bal mờ uă tŭ niam pa tàm bơtàu tơngguh lơh sa sồ, niam chài, jak chài măy mŏk.

Ală broă do ờ gơtùi ờ geh bơta lòt bal mờ tă pơgồp bơh mpồl cau geh bồ tơnggoh jak, cau cih jơnau đơs crih tam ya, cau lơh ƀăo dê. Ala măt đơng lam bồ càr Dăk Lăk, ồng Nguyễn Tuấn Hà, Phó Củ tịc Duh broă sùm Anih duh broă Làng bol càr Dăk Lăk neh pơyua jơnau nting bơr chờ hờp bal tus mờ jơh tơl nă cau geh bồ tơnggoh jak, cau cih jơnau đơs crih tam ya mờ cau lơh ƀăo, kơ̆p kờñ là nam 2025 rơ̆p pơn jăt tai là dồ nam lơh geh cồng nha, bal mờ uă tă pơgồp kwơmàng ai bơta bơtàu tơngguh bơh Dăk Lăk mờ bơh dà lơgar dê in.