Gĭt gơ̆p Việt Nam mờ Lào ngai sơlơ jrô ơnàng mờ geh cồng nha
Thứ bảy, 05:00, 05/04/2025 Cau mblàng: Lơ Mu K’Yến/VOV Cau mblàng: Lơ Mu K’Yến/VOV
VOV4.K’HO- Ồng Khamtay Siphandone, lài do là Củ tịc Mpồl Duh broă Đảng Dà lơgar Làng bol Kăc màng Lào, Cu tịc lơgar, Thủ tướng lơgar Kộng hoà Làng bol lơh tờm Làng bol Lào sang rài ngai 02 nhai 04. Nàng tơnggŏ nùs nhơm kah sơnđàc pơlai soh ngan ồng Khamtay Siphandone mờ gơlik bơh gĭt gơ̆p is ồn Việt Nam mờ Lào, Đảng, Dà lơgar Việt Nam neh lơh nền ies ƀồc ồng Khamtay Siphandone jăt broă lơh Dà lơgar ies ƀồc tàm 02 ngai, 04 mờ 05/04/2025.
Bơta gĭt gơ̆p dòn song, đềt mềr đah Việt Nam mờ Lào geh ală rơnàng đơng lam bàr Đảng, bàr Dà lơgar mờ Làng bol bàr lơgar dê roh uă dà kơlhề bơ̆t bơtàu mờ bơtàu tơngguh. Sơrlèt rlau 60 nam kờp bơh tŭ lơh gĭt gơ̆p cribơyai broă mờ lơgar ndai tus tŭ do, bơta gĭt gơ̆p is ồn do ngai sơlơ gơlòt mŭt ngan ngồn tàm uă broă mờ geh cồng nha rlau.

Tơngai do, gĭt gơ̆p cíñ trị, cribơyai broă mờ lơgar ndai pơn jăt tai bơtàu tơngguh niam bơnĕ, ngai sơlơ đềt mềr mờ pin dờn. Bàr đah jơhn nùs tàm pơgơl mpồl lòt còp bal mờ gơ̆p, tìp măt kâp dờng mờ ală kâp, pơgồp bơnah pơlam gùng jơh ală gĭt gơ̆p bàr lơgar. Lơh broă bal sền gàr dà lơgar- lơngăp lơngai bàr lơgar pơn jăt tai geh tơngguh tai jơh bal bè bơta niam mờ broă lơh. Bàr đah jơh nùs lam lơh ală jơnau ring bal, broă rơndăp lơh lơh broă bal; pơgồp bal ătbồ lik mŭt mờ lơgar ndai, jòi gŏ, kŭp kơryan ală caun lơh tìs gan tiah nhàr lơgar.

Lơh broă bal lơh sa, kă bro phan mờ bơcri priă đah bàr lơgar pơn jăt tai tam gơl niam ngan. Nàng kờñ ai tơl bơta ƀươn ai mpồl lơh sa kă bro mờ làng bol bàr lơgar in, bàr đah kĭ Sră cih kah bè bơtàu tơngguh mờ tàm tơrbŏ phan bơna kă bro phan tiah nhàr lơgar đah Việt Nam mờ Lào, Jơnau hơ bal Kă bro phan tiah nhàr lơgar Việt Nam mờ Lào. Kơnờm ală lơh ngan bơh jơh bal 2 đah dê, priă geh bơh kă bro phan đah 2 lơgar nam 2024 lơh geh tềl kah tŭ sơrlèt 2 tơmàn 200 tơlak dolar Mỹ, gơguh 34% pơndrờm mờ nam 2023.

Bơto bơtê mờ niam chài kung gam sơl là ală broă lơh broă bal geh bàr lơgar sền gròi. Tŭ do, geh rlau 14 rbô nă kơnòm bơsram Lào bơsram tàm lơgar Việt Nam. Bàr đah gam jơh nùs lơh jăt Ală jơnau neh lơh nền lơh broă bal bơto bơtê Việt Nam mờ Lào. Bal mờ hơ̆, bàr đah lơh ngan lơh jăt Broă rơndăp lơh lơh broă bal niam chài- đơs crih tam ya mờ lòt nhơl. Việt Nam dong kờl Lào geh Broă rơndăp lơh bơtàu tơngguh tàp pràn să jan Lào tơngai bơh nam 2023- 2030.

Lơh broă bal đah ală ƀòn lơgar, ngan là ală ƀòn lơgar geh bal gùng nhàr lơgar, pơn jăt tai geh tơngguh tai, ngai sơlơ gơlòt mŭt ngan ngồn tàm uă broă, tơl làm, pơgồp bơnah gàr niam lơngăp lơngai, rơndăp tăp sèng tàm ală kơnhoàl ù tiah nhàr lơgar 2 lơgar dê. Ală broă lơh geh bơh Nam Tam klăc Lơh bơyô bal Việt Nam mờ Lào 2022 kung bè uă broă llơh tìp măt lơh bơyô bal ală nam do pơgồp bơnah tơngguh tai bơta gĭt wă bal mờ lơh kơ̆ kơl jăp nùs nhơm tam klăc bal đah làng bol 2 lơgar.

Tàm lơh broă bal uă gah, 2 đah pơgồp bal kơ̆ kơl jăp, tàm dong kờl bal mờ gơ̆p tàm ală anih cribơyai kơnhoàl ù tiah do mờ ală lơgar, ngan là tàm tơngume Tơrgùm mpồl ală dà lơgar tiah đah jum măt tơngai Lik câu Á- Asean, Liên hợp quốc mờ ală mpồl tiah dềt.

Bàr đah bơyai lơh geh cồng nhai dơ̆ pơrjum dơ̆ 46 Anih duh broă ală cíñ phủ bè lơh broă bal 2 lơgar Việt Nam mờ Lào mờ Dơ̆ tìp kâp dờng đah Đảng Kộng sản Việt Nam mờ Đảng Làng bol Kăc màng Lào. Jăt tàm bơta sền swì ală cồng nha neh lơh geh, 2 đah ring bal ală pơlam gùng lơh broă bal dờng tàm tơngai tus.

Bơta gĭt gơ̆p isb ồn ờ huan ngan geh đah Việt Nam mờ Lào gam geh pơn jăt tai bơ̆t bơtàu bơtàu tơngguh jăt tàm bơta tài jơnau kờñ bal bơh bàr dà lơgar dê, bal mờ nùs nhơm ală lơgar àng sơrdah, lam kăc màng bàr lơgar rơhời sơrlèt ală bơta lòng, bơta kal ke.

Việt Nam mờ Lào rơ̆p pơn jăt tai lơh ngan tơngguh tai mờ lơh jrô ơnàng rlau tai gĭt gơ̆p lơh bơyô, tam klăc bal is ồn, lơh broă bal tơl làm, tài bơta kwơ rềp mềl ngan tàm rài kis bơh làng bol 2 lơgar dê, tài ring lơngai, lơh broă bal mờ bơtàu tơngguh tàm kơnhoàl ù tiah do mờ tàm dunia.

Cau mblàng: Lơ Mu K’Yến/VOV

Viết bình luận

TIN CÙNG CHUYÊN MỤC