tơnơ̆ mờ tŭ wă rò phan pơdơng, dơ̆ pơdơng phan duh khoai bal mờ bơyai lơh duh kkhoai jăt bơhiàn ờs mờng tềng hìu duh khoai Âu Lạc hờ đang bồ bơnơm Phượng Hoàng gơwèt Tiah lòt nhơl ñrùh Prenn, ƀòn dờng Dà Làc, kwang đơng lam bal mờ làng bol càr Lâm Đồng mờ gal cau năc lòt nhơl neh tus chu ñàng kah kơlôi rài mò ồng lài do.

Bơdìh mờ broă lơh yàng, broă lơh duh khoai Bơtau Hùng nam do tàm càr Lâm Đồng gam geh ală broă lơh đơs jơnau pơn đik ờs mờng, nhơl ală jơnau nhơl bè kờ tướng, hào ñjrong tơngi, pờng glah ù, ràng tăc phan sa, yal bơtik dà ce Việt Nam, thư pháp mờ ràng tơlik rùp.

Tàm càr Dăk Lăk, Lơh yàng duh kah Bơtau Hùng nam 2025 geh lơh yŭ rơyùm ngan tàm Tiah tềl lời wơl kah yau dà lơgar Hìu duh kah ƀòn Lạc Giao, ƀòn dờng Buôn Ma Thuột. Tơnơ̆ dơ̆ dròng cing Rơđê gờm chờ bơh mpồl cing ƀòn Ko Tam dê, Lơh yàng duh kah Bơtau Hùng tàm Dăk Lăk geh lơh dờng màng mờ ki ngàm ngan bal mờ bơnah lơh yàng ờs mờng bơh yau bơh mpồl ùr kwang bàng ơn pơdơng phan duh khuai dê lơh.

Ală cau ala măt neh chu ñàng pơdơng bơkàu mờ phan ơn pơdơng lơh yàng là ală phan bơna lơh geh bơh sươn sre, brê bơnơm pơnrơ mùl gŏ is ƀòn lơgar dê tềng jơnăng duh khuai Bơtau Hùng; yal dà kơlhề mờ jơnau nting bơr yal wơl jơnau kah yau khin cha jak chài bơh ală Bơtau Hùng rài bơ̆t mòn dà lơgar, jơnau kah yau tam lơh ai geh bơta lơngăp lơngai is jơi bơtiàn, tơrgùm dùl dà lơgar. Ồng Nguyễn Tuấn Hà, Phó Củ tịc duh broă sùm Anih duh broă Làng bol càr Dăk Lăk ala măt gơnoar ătbồ, làng bol ală jơi bơtiàn càr Dăk Lăk yal dà kơlhề mờ ală Bơtau Hùng in bè ală broă lơh geh mờ làng bol ală jơi bơtiàn tàm ù tiah càr dê neh lơh geh tàm ală nam do.

Tàm 2 ngai ơm rơlô lồi poh mờ ngai ơm rơlô duh khoai Bơtau Hùng bơh ngai 8 tus ngai 10 nhai 3 jăt tơngai àng kơnhai dê, git nđờ jơ̆t rơbô nă cau năc lòt nhơl neh rơwah càr Kon Tum là tiah tus nhơl mờ bal mờ làng bol kis tàm càr do wèt nùs nhơm hờ rài lài do jơi bơtiàn dê, đờm jăt bơhiàn niam bơnĕ kòn Lạc sao Hồng.

Tiah wă uă cau năc lòt nhơl ngan tàm càr Kon Tum dê tàm dơ̆ ơm rơlô Duh khoai Bơtau Hùng là ƀòn drà dềt Măng Đen, kơnhoàl Kon Plông, mờ mờr 20 rơbô nă cau. Bơdìh mờ broă tus sền ù tiah niam, sền ờ uă bơta niam chài ală jơi bơtiàn kis bơh yau tàm do dê, geh uă cau năc kung ai uă ngan tơngai nàng tus tàm ală tiah geh sùm bơhiàn duh khoai bơtau Hùng, bè Hìu duh khoai Đình Lương Khế tàm ƀòn dờng Kon Tum, hìu yàng phờk Tháp Kỳ Quang, kơnhoàl Đăk Hà nàng bal mờ làng bol kis tàm do chu ñàng kah kơlôi rài mò ồng lài do bơh jơi bơtiàn dê.