Ta rơh uănh nđôi tâm rgop đah ntŭk tăch rgâl ta Dak Lak ta khay 8 năm aơ, wa Niick Ruzzo, nuĭh leo kan công ty VOS Advisory, ta Mỹ dŭt ŭch đah ăp ntil ndơ nsoh n’hanh ndơ dŏng bâh nsol bŭnh. Wa Niick Ruzzo mpơl nău ŭch, ăp ntil ndơ bâh nsol bŭnh mhe geh nău ueh êng n’hanh mô geh djơh đah ntuk gŭ rêh lĕ pơk tay âk trong kan mhe gay ma tâm rgop ntuh kơl, tâm rgop tăch rgâl.

  “Gâp lĕ tât uănh năl ta du đê̆ ntŭk tuch tăm bâh nô Nguyễn Phú Tùng gay ma geh gĭt saơ nău tăm n’hanh ngăn ngên geh ŭch đah ndơ aơ, dŭt n’gơch n’hanh dơi dŏng âk nău kan. Gâp dŭt nđơr mbra geh du rơh nkhêp mhe pơk hvi ntuk tăch rgâl n’hanh mbơh tơih ntil ndơ kan mhe bâh nô tât đah âk nuĭh lơn”.

Nuĭh ma wa Niick Ruzzo nkah tât nĕ lah nô Nguyễn Phú Tùng, nuĭh njêng kan nkre ƀư Tổng giám đốc Công ty cổ phần Loofaa, ta nkuăl ƀon têh Buôn Ma Thuột, n’gor Đăk Lăk. Tĭng nô Nguyễn Phú Tùng, Loofaa geh ntơ lah Nsol bŭnh. Bâh nău uănh năl ta ntŭk tăch rgâl , nô Tùng geh saơ nsol bŭnh lah ndil ndơ geh dŏng âk, doh dŏng n’hanh ueh đah ntŭk gŭ rêh. Nô n’hanh ăp nuĭh kan ndrel lĕ geh mĭn uănh njêng ntil ndơ, njêng công ty gay ma tâm rgop tăch rvăt. Bâh ăp ntil ndơ bôk năp dŏng tâm jay ŭnh kơt dŏng săp nglah, săp kachok, ndơ săp pư nglah, ndơ rao ngan, ndơ rao kachok mô lah dŏng ŭm kơt dŏng tôl săk an xa bu..tâm rnôk ƀư, ăp nuĭh kan hôm nha geh ƀư âk ndơ ueh kơt lah dŭng cheng, môp, dep, dŭng jê̆...Công ty hôm nha geh ƀư ăp rơh tâm rlong mĭn ƀư gay ma joi ăp ntil ndơ dŏng ueh geh nău dong khlăy âk. Nô Nguyễn Phú Tùng an gĭt.

  “Aƀaơ gâp geh klâp ma 50 ntil ndơ. ntŭk rvăt ndơ gâp aƀaơ lah  Pháp, Hồng Kông. Ăp dak kan ndrel kơt Mỹ, Canada, Nhật Bản, Hàn Quốc lĕ sĭt khâl ta nkual mât tăm, tât khâl công ty gay ma ndrel tâm kơl kan. Ăp ntil ndơ geh ƀư bâh hên rgum ta ntil ndơ dŏng an dong ŭm, tâm ban kơt ndơ ta ja ŭnh n’hanh ăp ntil ndơ dŏng êng kơt môp, dŭng cheng, săp ntô jot...geh âk nuĭh mât uănh”.

Tĭng nău mbơh bâh nô Tùng đŏng, aƀaơ, ăp khay công ty geh ƀư rhiăng rbăn ntil ndơ dŏng an jay ŭm, jay ŭnh, êng đah ăp ntil ndơ nkrơ̆ rĭ mô âk, tĭng ta rnoh dăn rvăt tâm ban kơt rnoh ntŭk mât tăm. Yor aƀaơ rnoh ndơ tăm mô hŏ tŏng, mô hŏ tâm di đah nău ŭch nkra ƀư.

Gay ma rdâk njêng ndơ ƀư bâh ntơm, bơi tât 2 năm ba năp công ty cổ phần Loofaa lĕ tâm rgop đah 8 rnăk ƀon lan ta nkuăl ƀon têh Buôn Ma Thuột n’hanh nkuăl Krông Buk, tăm rlău 20ha bŭnh sŏk nsol, tâm ton rvăt lĕ đah rnoh ton lah 5 rbăn prăk/mblâm. Yuh H Wên Êban, ta phường Khánh Xuân, nkuăl ƀon têh Buôn Ma Thuột, n’gor Đăk Lăk nkoch đah nău tăch bŭnh play nse rĭ nău ký tâm ton kan đah công ty nsĭt tay săk rnglăy mpeh wăng sa âk lơn.

 “Ntơm nơh ta aơ jay gâp tăm biăp dơm, rnôk ký tâm ton kan đah công ty Loofaa du năm tăm geh 2 yan bŭnh, du năm geh 30 rbăn play, nău geh du năm klâp ma 300 rkeh /năm.

Đah nău âk pah kan aƀaơ, công ty dôl ntop pă nău kan đăp mpăn an 15 nuĭh kan, đah rnoh prăk khay bâh 3-6 rkeh prăk/khay. Yuh Nguyễn Thị Nguyệt Hồng, ta phường Khánh Xuân, nkuăl ƀon têh Buôn Ma Thuột, pah kan ta aơ an gĭt.

 “Gâp pah kan ta aơ klâp ma lĕ rlău 1 năm hôm. Nău kan ăp nar lah jĭm, koh, ƀư dŭng, môp. Nău kan aơ dŭt dơh, ntŭk pah kan ueh, ăp nuih rah rơch, rnoh prăk khay klâp ma 5-6 rkeh rĭ lĕ đăp mpăn đŏng”.

Đah nău kan geh ƀư âk ntil ndơ bâh nsol bŭnh nô Nguyễn Phú Tùng n’hanh ăp nuĭh kan ndrel geh nău ŭch ntop ntrôl nău dŏng ueh nđir n’hanh mât ntŭk gŭ rêh ueh, pă tay nău kan, n’hao nău geh an ƀon lan. Ndrel đah ăp ntil ndơ aƀaơ geh, ntŭk kan lĕ geh uănh joi njêng ăp ntil ndơ mhe gay ma n’hao tay nău geh dŏng bâh nsol bŭnh.