Rnôk aơ, knŭng êng Thôn Quý Đức, xã Ia Trôk, nkuăl Ia Pa, n’gor Gia Lai hŏ geh 10 ha neh gŭ ndrel neh tuch tăm geh rluh. N’gul ngih chùa ndrel ân trong hăn n’hanh n’gâng điện bah thôn Quý Đức hŏ geh dak me Sông Ba dôl klôn. Mô knŭng wa Nguyễn Xuân Hoà, ma ăp nŭih ƀon lan tâm Thôn Quý Đức kŏ geh nau rvê đŏng:

 ‘Yan mih ri dak lip hô ngăn, rluh lôch măng nar ro. Du rơh dak lip lăp lah rluh 3 tât 4 mét neh. Njok êp aơ hvi âk héc ta ngăn, ma rnôk aơ rluh tât ngih chùa, tât ngih gŭ ro”.

15 rnăk ƀon lan tâm Thôn Đăk Trá, Xã Ia Mrơn, nkuăl Ia Pa, n’gor Gia Lai kŏ geh nau mĭn rngot đŏng rnôk ma âk ha neh tuch tăm bah nơm geh rlu. Nau rvê ngăn lah 8 rnăk đah 33 nŭih geh ngih êp dak me hŏ geh mbơh tâm rnoh moh săk đă pă rgum ntrơn ntŭk gŭ bah năm 2011-2025 bah nkuăl Ia Pa, yơn tât rnôk aơ, ê geh ntrơn ơm. Wa Võ Văn Công, Bí thư đảng uỷ xã Ia Mrơn, nkual Ia Pa, ngơi:

 ‘Năm 2003 tât rnôk aơ, rluh rlau 50m tă bah dak me tât, khuch ngăn tât ăp rnăk rêh njok tâm 2 đah. Nŭih ƀon lan rvê ngăn nrôk mih têh, dak hoch tât. Ŭch n’gâng kan ăp gưl, rđau kan kơl an gay nau rêh ƀon lan geh đăp mpăn lơn”.

 Knŭng êng nkuăl Ia Pa, rnôk aơ geh 19 ntŭk rluh tâm njok 16km dak me Sông Ba. Rnoh neh tuch tăm ndrel neh gŭ geh rluh tât âk jêt ha. Tâm nê, 3 nkuăl geh nau khuch ngăn nê kah Thôn Quý Đức, xã Ia Trôk, ntung Ia Kdăm, xãIa Mrơn ndrel ntŭk pom dak Chư Răng 2, xã Chư Răng. Wa Huỳnh Văn Trường-Kruanh UBND nkuăl Ia Pa mbơh: Tâm ăp rnôk mâp ma ntoh nau HĐND ăp gưl, cử tri mro mbơh nau, ŭch geh kơl an doh rklaih. Yơn UBND nkual hôm vĭ vĕ yor ê geh prăk:

‘Êng neh gŭ bah ƀon lan, hôm geh neh tuch tăm. Ăp năm rluh hô ngăn. Bah năp nơh, nŭih ƀon lan rlong nau kan tăm tơm si, yơn mô dơi, hôm rluh neh ơm. Nŭih ƀon lan đă âk tŏ, đă ƀư mpir dak. Yơn tơm prăk ri âk ngăn, nkual mô geh nau dơi ƀư”.

 Bôk khay 4/2024, nkuăl Ia Pa ndrel N’gâng kan tuch tăm ndrel hun hao ƀon lan n’gor njoăl săm ƀŭt mbơh UBND n’gor Gia Lai mpeh nau rluh neh tâm nkuăl. N’gul khay 4/2024, wa Trương Hải Long-Kruanh UBND n’gor Gia Lai ndrel rmôt hăn kan bah n’gor Gia Lai ndrel ma rmôt hăn kan bah n’gor tât uănh tâm ntŭk xã Ia Trôk, Ia Mrơn, nkuăl Ia Pa.

Wa Trương Hải Long mbơh: Nau rluh mpir dak Sông Ba hŏ dŭt khuch hô ngăn, khuch tât drăp ndơ, nau rêh bah nŭih ƀon lan. Ndri ma, n’gor mra uănh gay ntrŭnh nau kan ndal, geh nau dơi gay ntrŭnh ƀư ăp nau kan ndal gay ma đă njrăng rdâng lơi rluh dak me Sông ba mpeh jŏ jong:

  ‘Jêh rnôk mbơh nau kan ndal ri nkuăl ân geh rgum nkre tâm nkuăl geh rluh mpir dak me gay geh nau kan đăp mpăn nau rêh bah nŭih ƀon lan. Nkual nchrăp ăp nau kan gay ma ƀư nâp, n’huch oi nau khuch rluh; ân geh nau mĭn tât nau kan rdâng, nkra mpir gay ma bah nau rluh gay đăp mpăn jŏ jong. Tâm nê, uănh khlay ngăn tât nau kan ntrơn leo lơi ăp rnăk ƀon lan rêp êp meng nkuăl geh nau khuch rlâm bah mir dak mhe. N’gâng kan tuch tăm ƀư tơm, tâm rgop ma ăp n’gâng kan, ntŭk kan geh tât ndrel nkuăl gay ndal mĭn, đă ntrŭnh ƀư ăp nau kan gay ma njrăng, rdâng, kơl rklaih tăbah rnôk geh rluh”.

 Tây Nguyên dôl rdâng đah prăng bri hô, dak me Sông Ba dôl kroh suăt. Yơn yan mih ri bơi dăch tât. Mir, neh tăm, ngih vâl ndrel n’ăp ma nau rêh bah âk rnăk vâl njôk bar đah dak me sông Ba dôl ma geh nau mbơh đă nkah njrăng hô ngăn./.