N’gor Gia Lai mhe ƀư rgŏ jă  ntrong leo “Pah kan ntĭm ƀon lan mô gĭt mrô”. Nău ƀư aơ gay ntĭm mbơh nău wât n’hanh nău blău mrô tât tĭng nuĭh ƀon lan, tĭng nsum mpôl-ngăn lah ta nkual thôn ƀon, nkual jru ngai, nkual rnoi mpôl đêt. Nău rƀŏng bah Gia Lai lah năp nău blău mrô bôk năp an đêt ngăn 80% cán bộ, công chức, viên chức; 100% kon hŏk THPT n’hanh sinh viên; ndrel đah 80% nuĭh ƀon lan tâm rnoh năm pah kan gĭt nău wât bôk năp mpeh công nghệ mrô. Pah kan ntĭm ƀon lan mô gĭt mrô mô knŭng lah bôk nău kan gưl ủy, n’gâng kan ƀon lan, ma jêng ntrong leo ŭch êng, ngăn ngên bah lam ƀon lan. Tâm nkoch ta nar ƀư rgŏ jă, wa Phan Văn Chiến-nai Ngih samƀŭt THPT Chi Lăng, nkual ƀon têh Pleiku-an gĭt:
 

Gâp saơ nău rgâl mrô kơl geh dŭt âk tâm nău kan ntĭm nti bah gâp. Nău ntĭm nti online, joi nu nău kon hŏk, ntŭk mrô tâm trôm dŭt dơh, ndơn yor bah năp đaơ an ƀư i ty. Dŭt âk nai aƀaơ lĕ gĭt tât đah công nghệ rgâl mrô n’hanh nar lơ rgâl âk gay ngăch tĭng trong hăn, kơl nău kan ntĭm nti mhe n’hanh săk rnglăy.

Gay dơi geh ăp nău rƀŏng, Gia Lai mĭn âk trong mkra khlay: Ntrôl dăng nkoch mbơh mpeh ntrong leo ta ăp trong mrô n’hanh báo chí nkoch mbơh, rdâk hao nuih n’hâm “nti êng, rgâl êng” tâm lam ƀon lan; Rgâl ngih samƀŭt, ngih văn hóa, ntŭk răk samƀŭt jêng ntŭk nti nsum mpôl mrô; Rgŏ jă nău lăp dăng bah cán bộ, đảng viên, rmôt chính trị-rêh jêng n’hanh doanh nghiệp công nghệ mrô.

Ta n’gor Dak Lak, nău ndơ̆ rhŏ kan an Ngân hàng tât dăch ƀon lan mô hôm lah nău ngơi, ma dôl dŏng ta ăp ƀon lan. Gay kơl nuĭh ƀon lan gĭt tât ăp nău rhŏ uĕh ngăn, Agribank ntŭk kan ta n’gor Dak Lak lĕ ƀư ăp bôk ndeh ngân hàng hăn ăp ntŭk, lăp tâm nkual jru tâm ăp ƀon lan jru ngai. Ăp ntŭk rhŏ kan ăp ntŭk dơi ƀư uĕh, kơt dŏng công nghệ mhe, nkre đăp mpăn rhŏ nău kan, nkre rhoăt đêt mông nar mkra samƀŭt. Knơm nĕ, hăng rbăn rmen prăk an manh kơl an tât đah nuĭh ƀon len nkual rnoi mpôl đêt. Wa Võ Tiến Nam, Groi Giám đốc Agrbak ntŭk kan n’gor Dak Lak an gĭt tât aƀaơ nkah rnon ta n’gor geh nklăp 22 rbăn rmen prăk, tâm nĕ dŭt âk an lŏ mir thôn ƀon.

Rmôt an manh hăn ăp ntŭk tât ăp nkual jru ngai, kơl kônh wa hăn nsong lŏ đah dŭt ngai. Kơt bah Nam Ka tât nkual têh Liên Sơn, nkuăl Lắk dŭt ngai tât 50km. Rnôk mpôl hên tâm pă ndeh chrai an prăk ta ăp ntŭk hăn, kônh wa ƀon lan dăp uănh mông nar, chrai an prăk manh dơh lơn. Yơn lah, hôm e jêr jŏt rnôk hăn lăp nkual jru ngai ri ntŭk ntô công nghệ mô hŏ tâm di ngăch.

Wât nău rgâl mrô lah trong hăn dŭt di, âk hợp tác xã lŏ mir ta Dak Lak lĕ n’hanh dôl nti, ngăn lah dŏng ăp trong mrô gay mpla nsơ n’hanh tăch ndơ. Âk ƀon lan ndơ̆ ndơ na nê̆ bah ntŭk nkra njêng tât ty nuĭh dŏng du trong ngăch. Hợp tác xã rhŏ an lŏ mir công bằng Cư Dlê Mnông ta nkual Cư M’gar, n’gor Dak Lak bah năp đaơ knŭng bên đah nău pă manh ntil, ndoh ndơ, phân poh, ntop kơl khoa học kỹ thuật kơl ƀon lan ƀư luh ndơ uĕh, yơn aƀaơ an dơn du nău ƀư tơm he, jêng nuĭh tơm uĕh tâm trong nău khlay, boăt nthoi nkra njêng đah ntŭk tăch, mpla nsơ moh êng ndơ ta ntŭk. Tĭng wa Thân Cư, Groi giám đốc hợp tác xã, gay ƀư tĭng uĕh nău kan nĕ ri an rgâl mrô, kơt dŏng công nghệ mrô tâm mpla nsơ ndơ lĕ kơl hợp tác xã gĭt tât ntŭk tăch ngăch n’hanh lam hvi lơn.

Gâp an n’hao tâm di nkre nkra njêng nkre tâm rgop gĭt công nghệ 4.0, gĭt trong tăch ndơ, gĭt tât ntŭk tăch, maketing gay rwăt tăch ta ntŭk tăch gay khân pơng gĭt ndơ bah gâp ƀư uĕh đŏng. Lah gâp ƀư uĕh ma gâp mô tâm rgâl, mô mbơh ri mbra dŭt lah mô tŏng geh.

Năm bah năp, tâm rgop hợp tác xã n’gor Dak Lak lĕ ƀư âk jrô tiăr nti mpeh nău blău tăch rgâl ta trong mrô, hun hao ndơ moh êng, ndâk ƀư rup gui an doanh nghiệp, hợp tác xã. Wa Lê Văn Dần, Groi kruanh Liên minh Hợp tác xã n’gor Dak lak mĭn lah tâm rnôk ntŭk tăch tâm rlong kơt aƀaơ, ndrel đah nău mhe trong nkra njêng, ăp hợp tác xã ntrôl dăng kơt dŏng công nghệ mrô tâm nău mpla nsơ, tăch ndơ ta âk ntŭk tăch điện tử.

Ntĭm nti tay jêng âk jrô nti gay ăp hợp tác xã gĭt tât ăp nău bôk năp ngăn bah tăch rgâl điện tử bah AI, jêh nĕ ăp jrô nti jru lơn an tĭng ndơ. Yor ăp ndơ mbra geh âk trong mbơh an n’gâng tơm tăch rgâl điện tử êng. Gay ăp hợp tác xã dơi gŭ ta hợp tác xã gâp hôm e dơi mpla nsơ, nkoch mbơh n’hanh tăch online tă bah ăp n’gâng tơm aƀaơ hin. Lơn lah kơl an ăp hợp tác xã ta nkual jru ngai dơi gĭt tât lĕ rngôch ăp ntŭk tăch.

Rgâl mrô mô hôm nău lah jru ngai, ma dôl mbrơi jêng du gưl khlay tâm nău rêh, nkra njêng n’hanh mât uănh kon nuĭh. Ăp nău nsrôih bah ntrong leo “Pah kan ntĭm ƀon lan mô gĭt mrô” ta Gia Lai mô lah ăp ntrong ƀư ngân hàng, hợp tác xã ta Dak Lak lĕ an saơ dŭt n’hâm n’hanh dơi tâm di têh bah ăp ntŭk Tây Nguyên. Rnôk tĭng nuĭh ƀon lan dơi an nti nsơm, gĭt tât n’hanh ƀư tơm công nghệ, ri rgâl mrô mbra hôm lah nău kan êng bah ngih pah kan, rmôt kan, ma jêng nuih n’hâm hun hao lĕ rngôch tâm rach năm mhe, rach năm rgâl hao bah rnoi nuĭh.

Gia Lai rgŏ jă Ntrong leo “Pah kan ntĭm ƀon lan mô gĭt mrô”

Bí thư N’gor ủy n’gor Gia Lai Hồ Văn Niên ntoh ngơi ta ƀư rgŏ jă

Ngân hàng hăn ăp ntŭk ta Dak Lak kơl nuĭh ƀon lan kơt dŏng rgâl mrô