Măng (26/6), Thủ tướng Phạm mInh Chính ndrel mpôl đại biểu gưl prêh Việt Nam luh Thượng Hải sĭt tât Hà Nội, lôch ăp rơh pah kan râng Rƀŭn nchră ăp năm ăp nuĭh hăn lor rơh tal 16 bah Rƀŭn nchră wăng sa lam ntŭr neh ƀư ta nkual ƀon têh Thiên Tân; khâl n’hanh pah kan ta Thượng Hải, Trung Quốc. Đah 30 nău ƀư na nao, âk tâm 3 nar bah rơh pah kan, mpôl Việt Nam lĕ n’glơi an nău uĕh n’hanh rgop khlay tâm lôch uĕh nsum bah rƀŭn nchră ăp năm ăp nuĭh hăn lor rơh tal 16 bah Rƀŭn nchră wăng sa lam ntŭr neh.

Tâm nar râng Rƀŭn nchră, Thủ tướng Chính phủ lĕ geh ăp rơh rƀŭn nchră, mâp đah âk nuĭh kruanh, nuĭh djôt bôk chính phủ, kruanh ăp dak kơt ăp nuĭh kan ndrel, doanh nghiệp... Dôl uănh, Thủ tướng lĕ geh rơh rgum nchră jru hvi đah Thủ tướng Trung Quốc Lý Cường gay n’hao nsing nơm chính trị, pơk hvi kan ndrel ngăn ngên n’hanh uănh nđôi uĕh lơn nău tâm rkeh, ndơ̆ tâm boh kan ndrel têh hvi lĕ rngôch, Nsum mpôl tâm nkoch nău rêh rgŏ năp Việt Nam-Trung Quốc geh nkô̆ têh hun hao đăp mpăn, uĕh lăng, săk rnglăy, jŏ jong.