Tĭng lôch jêh rơh thi tốt nghiệp THPT năm 2025, ta Gia Lai geh rlău 300 điểm 10 ta ăp môn thi. Bah nê an saơ kloh nău nsrôih mô gŭ rlu bah ăp kon se nti n’hanh pah kan kơi năp nti uĕh, geh nău tam bah ăp nhih nti.

Ngoăy tâm ăp kon se nti geh dŭt âk điểm ta rơh thi tốt nghiệp THPT năm aơ lah oh Bùi Thanh Lâm – Nhih nti THPT Chuyên Hùng Vương, gŭ ta phường Diên Hồng, n’gor Gia Lai. Lâm lah ngoăy tâm dŭt đêt nuĭh thi ta n’gor geh điểm 10 môn Tiếng Anh. Nkoch mpeh nău dơi dja, Lâm mpơl nău rhơn răm n’hanh ndrât ndal. Mpeh nău tă ơm gĭt kơt nti, Lâm lah rjăp nău khlay bah nău rƀah gĭt ngữ pháp n’hanh từ vựng bah âk năm nti. Lơn lah, păng hôm lor nkre ƀư đah ăp trong nti blău mhe, kơt pơk uănh ăp kênh YouTube ma tiếng Anh way mpeh khoa học gay blău djăt n’hanh ƀư gĭt âk từ vựng. Ma điện thoại, Lâm nkoch:

“Gay tâm pă gưl kon se nti dŭt kloh, yor câu dơh ri dŭt dơh, ma jêr ri dŭt jêr ngăn dĭl. Gâp mĭn ŭch geh điểm 10 ri ân geh n’gu tơm ơm bah rnôk jê̆ tât aƀaơ, từ vựng nkah hăr; lah gĭt ngữ pháp n’hanh rƀah gĭt lam lĕ rngôch ri mbra ƀư dơi bar pe gâl. Gâp way pơk uănh tay ăp kênh YouTube geh âk từ vựng, dơh djăt ngơi kơt Bsport, mô lah Mini Earth n’hanh âk mbrô pơk êng ƀa ƀă đŏng”.

Oh Bành Gia Huân, kon se nti Nhih nti THPT chuyên Lê Quý Đôn (Quy Nhơn) lah ngoăy tâm ăp kon se nti dŭt ntoh lư đah bar điểm 10 ta môn Tiếng Anh n’hanh Vật lý. Nău dơi dja mô dơn lah nău n’hao êng săk bah oh nơm ma hôm lah nău rhơn nsum bah nhih nti n’hanh rnăk wâl đŏng. Gay dơi geh nău dja, Bành Gia Huân hŏ geh du rêng ôn luyện ăp tŏng rêng n’hanh trong kơt nti khoa học. Đah môn Vật lý, nău gân djăng khoa học hŏ kơl Huân tât đah môn nti dja du trong nchrăp lor. Oh way giải ăp bài tập jêr, joi gĭt gru ăp đề lý thuyết n’hanh thực hành rlong giải đề thi gay nkah gay nău tă ơm gĭt nti n’hanh ƀư bên đah nău mpet jâk tâm jrô thi. Đah môn Tiếng Anh, bol geh ndrât ndal du đêt mpeh điểm hŏ dơi geh yơn oh nha hôm nsing nơm geh nău dơi thi uĕh  đŏng yor aơ lah môn way ŭch nti:

“Gâp ndrât ndal đŏng yor môn Tiếng Anh hŏ sŏk mplơ̆ lĕ đề n’hanh giấy nháp jêng gâp mô blău chấm. Ta nhih nti gâp nti jrô chuyên Anh ntop lah gŭ tâm rmôt sơch hăn thi kon se nti blău lam dak đŏng jêng dơi nhih nti kơi năp nti âk. Hôm ta jay ri gâp way uănh ăp video ma Tiếng Anh gay kơt nti âk ntil”.

 Wa Nguyễn Thị Bé, mê̆ oh Bành Gia Huân, mô mpôn dơi nău rhơn n’hanh nău n’hao êng săk. Wa Bé nkoch, rnăk wâl way lah tơm nđơr têh, nta trong dŭt dơh gay Huân rgum tâm nău kơt nti. Đah jâng nsing nâp n’hanh trong rƀŏng kloh rvah, Huân dôl nchrăp an njăr trong hăn nti đại học n’hanh tĭng nău ŭch rŏng bah he.

“Nău mpŏng bah mon lah đỗ Đại học Bách khoa Nkual ƀon têh Hồ Chí Minh, Khoa Khoa học Công Nghệ jêng rnăk wâl way ntrŭt nsôr, nti n’gâng kan nê ri ŏ r’ah jêng nti ân dŭt nsrôih ngăn gay ban tĭng nău nti”.

Tâm rnoh 327 kon se nti ta Gia Lai geh điểm 10 ta rơh thi tốt nghiệp THPT 2025 lơn âk ta ăp môn mpeh rmôt Khoa học xã hội n’hanh Khoa học tự nhiên. Nău dja an saơ nău tâm ban tâm săk blău ntĭm nti n’hanh nău dơi bah kon se nti ta n’gor./.