Nkual công nghiệp Nam Pleiku (xă Bờ Noong, n’gor Gia Lai) dơi Thủ tướng Chính phủ uănh an nău ntrŭnh ntuh kơl bah khay 9/2019. Nău nchrăp ƀư geh bơi 200ha, dĭng lĕ prăk ntuh kơl rlău 500 rmen prăk, yor Tâp đoàn Công nghiệp Cao su Việt Nam ƀư tơm ntuh kơl. Nău rƀŏng jêh lvang ngoăy tâm năm 2022 n’hanh tŏng ăp nkual công nghiệp tâm 5 năm. Yơn lah, tât aƀaơ nău nchrăp ƀư mô hŏ dơi pơk dŏng yor wăk kol samƀŭt hành chính, ƀư di dăp rgum.

Ta nar uănh nđôi ta ntŭk mhe aơ, Bí thư N’gor ủy Gia Lai Hồ Quốc Dũng lĕ đă nuĭh tơm ntuh kơl an jêh trong mkra dak djiah n’hanh ăp ndơ ƀư bah n’har tâm 4 khay, nkre tâm rgop rjăp đah ăp n’gâng kan, nău kan gay ntrôl ngăch ƀư. Wa Lê Trung Kiên, Tổng Giám đốc Công ty TNHH MTV Cao su Chư Sê ntŭk kan na nê̆ mbơh nău nchrăp ƀư-an gĭt:

Jêh ntĭm rđău bah kruanh n’gor, công ty lĕ dơn geh nău ntĭm bah Ban mât uănh nkual wăng sa Gia Lai. Mpôl hên mbra mbơh ƀư ăp ndơ bah dih n’har, nkra di nău nchrăp ƀư ntuh kơl an tâm di đah nău ntrŭnh pháp luật, nkre dăn đă tay n’gor uănh an nău ntrŭnh ntuh kơl n’hanh ndăn ndâk ƀư gay ndơ̆ an dŏng.

Ta phường Pleiku, nău nchrăp ƀư nkual têh si glê ntŭk ntô CK54 dơi mĭn lah “mpông pơk” an ntrôl hun hao nkual têh, nkre lah nuih n’hâm khlay an nău kan pâl nđaih n’hanh nău rhŏ sa. Nău nchrăp ƀư têh 240 ha, rnoh nuĭh nchrăp nklăp 17.000 nuĭh, nchrŏng trong hun hao nkual têh ntrong leo đah ntung trong ngih wâl mhe, rgum âk nău dơh mpeh tăch rgâl, ntĭm nti, dak si, pâl rlưn. Wa Đặng Toàn Thắng, Kruanh UBND phường Pleiku, an gĭt, ƀon lan dôl nsrôih tâm rgop đah ntŭk kan geh tât gay jêh lĕ rngôch nău kan gay ngăch ƀư tâm rơh Quốc khánh êp tât.

Nkual têh si glê ntŭk ntô CK54 dơi pơk mbra ntŭk ƀư bôk năp, lah mpông pơk rgop ntrôl hun hao wăng sa-rêh jêng bah n’gor. Geh âk ntil ndơ ntoh lư kơt tach golf 10 trôm, nkual tăch rgâl, siêu thị rwăt năp bơi 5 ha, công viên dak, khách sạn tâm di 5 sao, ntŭk rƀŭn nchră... Đah mpêr n’gar uĕh, trôk nar rlu rlău uĕh, nău nchrăp ƀư mbra lah ntŭk wăch rgum ntuh kơl, pâl nđaih n’hanh rlet rlău ƀư ngăn.

Tâm rơh pah kan mhe rlău ta ăp xă phường mpeh bah lơ nhâp nar n’gor, Bí thư N’gor ủy n’hanh Kruanh UBND n’gor Gia Lai lĕ hăn uănh nđôi du đêt nău nchrăp ƀư têh êng kơt tach golf Đăk Đoa, nkual pâl nđaih văn hóa-nkual têh si glê ntŭk ntô yôk n’ho Pleiku n’hanh n’hanh rgum rƀŭn khách sạn-tach golf FLC ta Đăk Đoa. Kruanh n’gor Gia Lai ntĭm rđău dŭt n’hâm ăp n’gâng kan nău kan, ƀon lan tâm rgop uĕh jêh samƀŭt pháp lý gay pơk ƀư âk nău nchrăp ƀư aơ. Nău kan n’gor Gia Lai dŭt n’hâm pơk trong âk nău nchrăp ƀư “bĭch chuêl” mbra kơl mkra nău dơi geh nkual mpeh bah lơ nhâp nar, jêng ăp trong hao jêng mhe n’hanh n’hao săk rnglăy dŏng neh ntu n’hanh tu tơm ntuh kơl ta lam n’gor./.