Ta ntŭk kan Radio Việt Nam tâm nkuăl Tây Nguyên, yuh H’Nêc Ênuôl, đảng viên mhe, nŭih ntoh nau ngơi rnoi Rđe, hôm tăng tâm ăp nar. Bah nau ntoh ngơi, ăp nkô̆ nau ntrŭnh, ntrong kan bah Đảng, Ngih dak tât ma ăp ƀon lan ngai, ntŭk ma nau ngơi jêng ntung njŏ bah Đảng, Ngih dak tât đah ăp ƀon lan ngai, ăp nau ngơi lah ntung nthoi khlay nthoi nau rnơm bah ƀon lan ăp rnoi ma Đảng. Yuh H’Nêc Ênuôl nkoch:

‘Gâp têh tâm ƀon lan, gâp lơn ma gĭt rbăng nau ngơi bah kônh wa nơm păng mhâm geh nau khlay. Ăp nau mhe, ăp nkô̆ nau nkoch kŏ geh hên nsôih ntoh ma nau ngơi ân tâm dăch ngăn ngên, nơih gĭt ngăn ăp nau ntrŭnh, ntrong kan bah Đảng, Ngih dak tât tâm dăch lơn ma kônh wa. Ntơm nar lăp Đảng, gâp lơn ma saơ klohy nau kan bah nŭih ƀư Báo, ƀư nau ntoh ngơi ndrel mro geh nau ntô̆ n’hao săk yor geh nau rgop gay ƀư mât nau rnơm bah ƀon lan ma Đảng”.

Lah nau ngơi lah ntŭk nthoi ăp nau rnơm ri nau ơm vay nê lah tu tơm bah nau tâm rnglăp. Tâm xã Cuôr Đăng, n’gor Dak Lak, yuh H’Pha Ayun. Đảng viên mhe, Bí thư Đoàn xã, rnôk aơ ƀư nau kan chuyên viên Văn phòng Đảng ủy xã, mro nsôih bonh đă druh ndăm mât nau ơm ueh, nkre geh nsum ma hun hao văng sa nsum mpôl. Yuh H’Pha Ayun, mbơh:

‘Xã Cuôr Đăng hŏ ndâk 2 rmôt tur chĭng nsum ndrel ma rmôt ƀư ndrĭng nau ân ăp băl mom druh ndăm, gay ăp băl gĭt lơn tât nau vay ơm chĭng gong, nau ndrĭng bah rnoi nơm. Dĭng lĕ ăp băl nê jêh rnôk lăp râng tâm rmôt kan aơ mra blau tur chĭng, gĭt lơn tât nau ndrĭng bah rnoi nơm. Bah nê, ăp băl geh dơi nau tâm n’ur, rgop nau mât nau vay ơm ueh bah ăp rnoi tât ăp băn mom, druh ndăm tâm n’gor Dak Lak”.

Ndrel ma nau mât nau ơm yau, mom ndăm ăp ƀon lan tâm Dak Lak hôm lah rmôt leo trong tâm nau ntrơn rgâl mrô, du nau kan tơm ma Đảng, Ngih dak dôl nsôih ntrŭnh ƀư. Nô Y Lê Pas Tơr-Groi Bí thư Rnâng kan Đoàn n’gor ủy Dak Lak, mbơh, mom ndăm ăp rnoi mpôl đê̆ mô knŭng rnơm tâm nau kan bah Đảng ma hôm leo trong lor gay ƀư ăp nau kan mhe, kơt kơl an ƀon lan ndơn dŏng nau kan mhe, kơt kơl an ƀon kan dŏng nau kan trực tuyến, nthoi nau kan gay tăch luh ndơ tuch tăm bah trong tăch rgâl điện tử:

“Hên ndâk ăp rmôt kan ƀư nau kan kơl an dŏng n’gâng kan 2 gưl, ntiưm mbơh ƀon lan ƀư nau kan trực tuyến. Ăp rmôt ƀư nau kan nsum mpôl ƀư ân ueh nau săk tam tâm nkuăl jru, nkuăl ngai. Bah nê, mom ndăm hôm rgop nau khlay tâm nau kan ndâk njêng ƀon lan mhe, đô thị ueh nâp mhe ndrel hun hao nâp nâl”.

Mât nau nau rnơm, mât nau ơm ueh ndrel nchrăp tâm rnglăp, rmôt đảng viên mom rnoi mpôl đê̆ Dak Lak dôl nar lơn ma ntoh nau dơi lah ntung nthoi nâp nâl đah Đảng ndrel ƀon lan. Khân păng lah ăp nŭih ƀư nau kan leo nau ntrŭnh bah Đảng tât tâm dăch lơn ma nau rêh ƀon lan, rgop nau ndâk njêng ƀon lan sâm geh, dăng, ăp nau vay ơm ndrel hun hao nâp nâl ndrel ma neh dak./.