Rbăn sinh viên tâm kơl kan tâm n’gor n’hanh bah dih n’gor Đăk Lăk, dôl tât râng ăp nău pah kan mât đăp mpăn nău rêh jêng ta xã n’har bri Ea Rốk n’hanh Ia Lôp, n’gor Đăk Lăk, nkre lah ƀư tĭng geh âk nău pah kan, ndơ kan khlăy ta ntŭk. Mpôl tâm kơl kan geh 45 sinh viên bâh ngih nti Đại học Nam Cần Thơ lĕ tâm rgop đah đoàn viên, mom ndăm ta ntŭk ƀư geh âk nău kan khlăy, kơt lah: pă an săm ƀŭt giáo khoa n’hanh ndơ dŏng nti an kon hoc nti tiểu học, rdâk ƀư ntŭk pâl rlưn n’hanh leo ƀư an pâl rlưn nti ta khay rlu nti an oh kon se jê̆, pă loa kẹo kéo an ăp ngih văn hóa. Ta meng nĕ, rhiăng rbăn n’ha cờ ngih dak geh pă tât ti nuĭh ƀon lan, rbăn mi tôm duh hôr geh njoăl tât ăp oh jê̆ n’hanh nuĭh ranh gŭ êng. Dơn nklâm ndơ n’hanh ndơ dŏng nti an  kon bu klô nchrăp nti lăp jrô 4, wa Huỳnh Thị Cẩm Tú, ta thôn Dự, xã Ia Lôp, n’gor Đăk Lăk rhơn nkoch.

 “Ta aơ lah nkual njônh ngai jêng geh dơn ăp nklâm ndơ kơt aơ lah dŭt rhơn ngăn, ăp oh kon se jê̆ dŭt ŭch, dŭt rhơn n’hanh ueh ngăn. Lah ueh ăp băl sinh viên bâh ngai lĕ tât ta aơ an ăp oh mon geh ăp nklâm ndơ dŭt khlăy kơt aơ”.

Mô dơn nsĭt tay âk ndơ khlăy mpeh ndơ dŏng, mpôl kan tâm kơl sinh viên hôm nha geh mbơh tơih mpeh pháp luật mpeh njrăng nău tâm tom mpet đah oh bu ur, ma túy n’hanh bu tăch rvăt nuĭh, ntop n’hao nău gĭt vât, nău blău mât êng săk nơm an nuĭh ƀon lan ta n’har bri. Lĕ rnoh khlăy ăp nău pah kan geh rlău 300 rkeh prăk. Sinh viên Mai Huỳnh Đặng, nuĭh kan tâm rmôt kan tâm kơl kan nkoch, du pơh tâm kơl kan mô jŏ, yơn lĕ an tay ăp nău jêr mô dơi chuêl mô dơn kanŭng đah nuĭh ƀon lan nkual dak lêng ma lĕ đah sinh viên đŏng.

 “Rlău ăp ntil nău ma gâp kâp knơm n’hanh nchrăp lor ta năp nĕ. Yor oh tă geh nău tă gĭt blău kan tâm nău ƀư tĭng khay rlu nti ta Tây Nguyên lôch nĕ lah ăp rơh aơ geh âk tay nău mĭn nău ueh mhe lơn. Lôch trong kan aơ rĭ oh geh tay ăp nău tă gĭt blău mhe, nău nti mhe an ăp rơh tâm kơl kan let năp tay, kơl an oh ƀư lôch ƀư blău an săk nơm âk lơn mpeh ăp nău pah kan ta ntŭk rêh jêng”.

Ta xã Hòa Phú, n’gor Đăk Lăk, rlău 500 cán bộ, tahen Trung đoàn 584 bâh Bộ chỉ huy quân sự n’gor Đăk Lăk ndrel đah âk đoàn viên mom ndăm ta ntŭk mhe geh nău kan Tâm kơl kan khay rlu nti năm 2025 tĭng nău nchrăp bâh Bộ chỉ huy quân sự n’gor n’hanh Ủy ban MTTQ Việt Nam n’gor. Tâm nău kan jŏ 45 nar, cán bộ, tahen n’hanh đoàn viên mom ndăm ăp xã Hòa Phú, Ea Kiết n’hanh phường Tân Lập n’gor Đăk Lak ndrel tât râng nkra tay trong hăn ta nkual ƀon lan, tăm tơm si nđir, rdâk ƀư nău kan tâm rnglăp ƀon lan, tahen, ngih jay gŭ an rnăk dơi kơl, nkra mhe ueh tay trong hăn let thôn, xã, phường, n’hanh kơl an ƀon lan rgâl mhe rnoh mbrô, ƀư tĭng nău way kan hành chính tâm rnôk nglăp nsum ntŭk kan. Tât râng nău kan ta ôi aơ ta xã Hòa Phú, Đại úy Phan Thanh Tài, Tiểu đoàn 303- trung đoàn 584 bâh Bộ chỉ huy quân sự n’gor Đăk Lăk an gĭt, nău kan ntơm bâh nar aơ tât lơ 30/8, nchrăp mbra nkra mhe 150 ngih jay kơl an ăp rnăk dơi kơl, nkra mhe rlău 90km trong hăn let thôn, tăm rbăn tơm si ueh nđir ta ăp xã mhe.

 “Rơh 1 năm 2025, mpôl hên rgum geh rlău 100 cán bộ, tahen gay ma ƀư tĭng ăp nău kan ta 2 xã n’hanh 1 phường, rgum ƀư ueh trong n’hong dak, mât kuaih ueh ntŭk kan, kơl an ăp rnăk dơi kơl đah âk nkô̆ nău kan na nê̆...Bâh nĕ, ntop rdâk njêng nău tâm rnglăp tahen- ƀon lan, njêng nău kan ueh nâp jăp gay ma hên ƀư lôch nău kan mât đăp mpăn rnă njrăng, mât đăp mpăn ngih dak”.

 Ndrel tât râng nău kan rơh aơ, ta xã Hòa Phú, n’gor Đăk Lăk, đoàn viên, mom ndăm ta ntŭk lĕ nsrôih ƀư tĭng ăp nău kan kơt lah mât kloh ueh ntŭk ngŭ rêh, kơl an ƀon lan rgâl mhe rnoh mbrô, ntĭm leo ƀư nău kan hành chính điện tử. Nô Lê Dương Bá Ước, groi kruanh ủy ban MTTQ Việt Nam xã Hòa Phú, mât leo nău kan Đoàn xã an gĭr, bol ma ta ntŭk mhe geh nglăp nsum, rmôt nău kan âk, yơn mpôl đoàn viên, mom ndăm way hăn lor, hăn ndrel đah tahen tâm nău kan rgŏ jă ƀon kan n’hanh rdâk njêng ƀon lan mhe.

 "Đoàn xã tâm rgop đah Trung đoàn 584 kơl nar pah kan kơl an ƀon lan rek ba, cà phê n’hanh tiu ta yan dum. Rlău ma nĕ, mpôl hên hôm nha geh mbơh ƀư ăp nău kan, nău kan mom ndăm, ntoh lư lah nău kan ntŭk an bun ndok ƀô djơh ta thôn 8, xã Hòa Khánh (ơm).

Ăp nău kan na nê̆, ngăn ngên tâm trong kan mom ndăm tâm kơl khay rlu nti 2025 ta Đăk Lăk mô dơn mpơl nău dơn kan, nău nsrôih bâh mom ndăm ma hôm nha ntop ueh âk rgâl mhe nău rêh bâh ƀon lan ta nkual dak lêng, nkual njônh ngai, nkual jêr jŏt. Bâh ăp nklâm ndơ nĕ, ăp nău kan ntŭk rêh jêng tât rgŏ jă ƀon lan têh hvi, lĕ rngôch trĕ lam nău mbơh ueh di, tâm rnglăp tâm pêt tâm kơl đah sinh viên , tahen n’hanh ƀon lan.

VOV Tây Nguyên